O le Aso Tofi o le vaiaso ua mavae na taunuu ai i laufanua o Aukilani le ausiva toatele a le Le Taupou Manaia mai i Upolu ma Tutuila, lea e onosefululima le aumalaga faatasi a fanau ma mātua o loo malaga mai ai. E ta’i fa tausaga agai i luga i le sefuluono le matutua o fanau tamaitai o loo auai i le ausiva lenei a Le Taupou Manaia mai Samoa ma Tutuila ma o loo taitai mai e le afioga ia Tuifaasisina Korina Seiuli Lee ma o le faiaoga foi lea o le ausiva.
O le faamoemoe maualuga o le faigamalaga i totonu o Aotearoa o le tatalaina lea o le isi lala o Le Taupou Manaia i Aukilani faatasi ai ma le faamanatuina o le 20 tausaga talu ona faavaeina mai lenei ausiva i Samoa, ma o lea faamoemoe e faia lea i le faaiuga o le vaiaso nei.
I le Aso Toonai ua mavae na amata faafiafia ai Le Taupou Manaia i Aukilani i nisi o ana faafiafiaga, e ala i valaaulia na tuuina mai ia i latou e faafiafia ai i le polokalame sa faia i le Community hall i Magele. O le Aso Gafua na valaaulia ai e faafiafia i le aoga a Epson Girls, o le Aso Lua e faafiafia ai i le aoga a Baradene College, o le Aso Lulu e auai atu ai i le Pacific Dance New Zealand ma le Aso Tofi e faafiafia ai i le Museum i le aoauli i le taimi o le taumafataga; o le avanoa lea sa masani ona faafiafia ai Maoli ae o lea ua malolo Maoli ae tuu mai le avanoa e faafiafia ai Le Taupou Manaia mai Samoa ma Tutuila.
Faaalia e le afioga i le taitai malaga ia Tuifaasisina Korina Seiuli Lee, o le tāua o nei faafiafiaga i le vaiaso o se avanoa lelei mo nai fanau o lea faatoa malaga mai i Aotearoa nei i le malaga a Le Taupou Manaia, e faamasani atili ai i le tulai i luma o tagata ma sisiva. O lona ia foi talitonuga ua masani lelei teineiti i le tulai i luma o tagata e pei ona iai a latou aoga pe a fai, aemaise ai o nisi o a latou faafiafiaga pe a fai i nisi o valaaulia. Auā o mea uma nei e mafai ona tuuina i totonu i taimi o a latou a’oa’oga, o le a’oina o le siva, o le tulai i luma o tagata faatasi ai ma foliga vaaia.
Ma e ui i le faigata i le tau amataina o nai fanau laiti i le uluai taimi e a’oa’oina ai, ae alu alu lava ua ia vaaia le fiafia o fanau latiti ma ua iai foi lo latou fiafia e faatino le siva auā le faatāuaina o le measina lea a le atunuu. O le malosi foi o le lagolago a mātua o le isi lea galuega faigofie mo ia, ona o le tulai atu o mātua e tuuina atu lo latou tau’au e tausoa faatasi ai le faamoemoe mo fanau lalovaoa o Samoa mo a taeao.
O le tele o a latou faafiafiaga o loo feoai ai, o loo mafai ona sisiva faatasi fanau amata, o fanau feololo ma fanau matutua poo fanau ua leva ona iai i le ausiva. Ma o se tasi lea vaaiga lelei mo le latou faamoemoe, e iai le talitonuga e mae’a ane le malaga lenei ua siitia i le isi tulaga i luga atu o le sisiva ua iai le fanau amata ona o loo mafai ona galulue faatasi uma teineiti i totonu o le polokalame.
E fā masina sa tapena ma tuufaatasi mai ai lenei faamoemoe, ma e lagona ai lava le loto faafetai o le afioga ia Tuifaassina Korina Seiuli Lee i le faigofie o tapenaga o le malaga ona o le malosi o le lagolago a mātua e ala lea i le totogiina o pasese o fanau, ae o le latou komiti sa gafa lea ma le totogiina o nofoaga e faamautu ai fanau i Aukilani, o meaai faatasi ai ma taavale e feoai ai le malaga pe a taunuu mai i Aotearoa.
O le agaga faafetai foi o le afioga ia Tuifaasisina ona o kamupani eseese i Samoa ma Tutuila o loo lagolagoina le latou faamoemoe, faatasi ai ma kamupani i Niu Sila nei o loo iai foi lo latou sao i le latou faigamalaga. O le kamupani a le Samoa Air Ways sa fesoasoani ia latou pasese ae o le G-Mana Wholesale Autos o loo lagolagoina a latou faasalalauga o loo fai e faalauiloa ai le latou polokalame.
