O le vaitaimi nei o le tausaga e tumutumu ai le malae taalo poo le paka i Otara i tapuaiga a nuu, ekalesia ma faalapotopotoga e autovaa atu e tapuia le alofaiva o latou tama fanau i taaloga o le kirikiti e pei ona masani ai i tausaga taitasi. E lē gata i tama ma tina matutua ua avea lea avanoa e tafafao ma matamata ai i taaloga ao tupulaga talavou foi ua mafai ona faaali ai le taleni i lea foi faagatama o taaloga a le atunuu.
O le taaloga lenei o loo suifesiloi lona faatinoina i le taaloga kirikiti faaSamoa ma le kilikiti faapalagi. Ae o le tāua o lea faiga o loo mafai ona fetufaai ai le iloa o alo ma tama fanau o le atunuu e fiafia i le taaloga kilikiti faaSamoa faapea ma fanau e fiafia i le kilikiti faapalagi, ona e iai nisi o fanau sa fananau i atunuu i fafo sa tele lo latou aoaoina o lea taaloga i le faiga o taaloga i atunuu i fafo ae e iai foi nisi o tama ma fanau sa malaga mai i Samoa sa fiafia lava i le taaloga lea i Samoa.
O le faiga lenei o le taamilosaga o loo faatuputupulaia ai pea le alualu i luma o le tomai o fanau i lea taaloga a le atunuu na masani mai ai, ae ua maitauina ai foi le faigata ona toe motusia lea taamilosaga i tausaga taitasi. Pei ona maitau iai, ua 27 tausaga talu ona faagasolo lenei taamilosaga i totonu o Aukilani, ma o se taamilosaga e pito sili lea ona umi i taamilosaga uma i le itu Samoa. I soo se tausaga lava e valaaulia ai se ‘au mai Samoa e mafai ona auai mai e molimauina le tāua o le anavatau ma le manulauti o loo taumafai le taamilosaga lenei a le PIMKA e momoli mo tupulaga a alo ma tama fanau o le atunuu o loo aumau i Niu Sila nei. E lē o le manumalo poo le faiaina ae ia maua e tupulaga talavou le fealofani, ma ia maua le fetausiai o aiga nuu ma ekalesia i soo se mafutaga. Ia aoga faagata e masani ai tupulaga, ma o le fu’a taualauga lea e agiagia pea i tausaga uma i totonu o le PIMKA.
O le luitau a le afioga ia Patele Muliau Stowers e malaga mai Solosolo i Samoa ma lana ‘au o le afaluko e faapea, o mea nei o faagatama, o taaloga faauso, faaletuafafine ma tuagane i alo ma fanau o Samoa. Ia tulimatai i le faagasoloina o lenei taamilosaga le fealofani o uso i totonu o taaloga. E lē tāua le malo ae tāua le maua o le nofo fealofani aua o le finagalo moni lea o le Alii Faaola ma lana fanau.
O le saunoaga a le afioga i le peresetene ia Sola na ia momoli ai lona agaga faafetai i kapeteini uma o ‘au taitasi ua mafai ona auai i le faatinoina o le faamoemoe o le PIMKA i lenei tausaga aemaise ai o lana faafetai i le afioga ia Patele Muliau Stowers i upu faalaeiau ua tapena faafafine toaga ai lagona o tama taalo aua le tausinioga o taaloga. Faaleo foi le agaga fiafia ma le loto faafetai o le peresetene i le komiti faafoe o le taamilosaga ona o le faamaopopoina lava o lenei taamilosaga aua se mafutaga mafanafana o alo ma fanau o Samoa.
E 16 ‘au a alii ua tauina le taua o mafaufauga i le itupa o alii, ae lua Pool ua vaevaeina iai. O le POOL A o loo aofia ai le Kobras, Ao Atua, Maa Pupula, Tama o le Papa, Lau laau mai Farani, Amoa i Sisifo, Riversdale ma le PIC Papakura.
POOL B – E aofia ai Malaka, Tama o le Meko, Povi Poa, Mountains Boys, Loto Taumafai, Afaluko, Ainiusami ma le Maata.
O ‘au a tamaitai, e 7 ‘au sa auai ae o loo faagasolo i taamilosaga, o le ‘au Madam Onyx, Teine o le Papa, G.I Katoliko, Amoa i Sisifo, Nofoloa, Black Widows ma le Ao Atua.
Iuga o taaloga i le Aso Toonai muamua
Au Tamaitai
Madam Onyx manumalo i Teine o le Papa, G.I Katoliko manumalo Amoa i Sisifo, Black Widows manumalo Nifoloa, Ao Atua manumalo Teine o le Papa ma le Amoa i Sisifo manumalo ia Black Widows.
Au Alii POOL A
Kobras beat Ao Atua, Maa Pupula beat Tama o le Papa, Lau laau mai Farani manumalo Amoa i Sisifo, Riversdale manumalo PIC Papakura, Ao Atua manumalo i le Maa Pupula, Ao Atua manumalo Amoa i Sisifo.
Au Alii POOL B
Malaka manumalo Tama o le Meko, Povi Poa manumalo Mountains Boys, Lototaumafai manumalo Afaluko, Povi Poa manumalo Tama o le Meko, Afaluko manumalo Mountains Boys, ma le Maata manumalo i le Ainiusami.
