Rev Sean Palala ma lona faletua ia Faufau Palala, tina matua ia Efo Tafunai i le suaina o le eleele

Rev Sean Palala ma lona faletua ia Faufau Palala, tina matua ia Efo Tafunai i le suaina o le eleele

O le Aso Toonai ua mavae 12 o Ianuari na suatia ma faapaiaina ai le eleele o le ekalesia o le Taeaoafua i Magele i le toe fausiaina lea o le malumalu tapuai fou a le ekalesia mo ana sauniga i Aso Sa. O le susuga i le toeaina o le Pulega i Manukau ia Petaia Lokeni na ia taitaiina lea sauniga ae sa aofia potopoto uma atu iai ma isi faafeagaiga ma o latou faletua o le pulega faapea o uo ma ē masani e molimauina le faamoemoe o le aso.

O le taupati atu o le mamalu o le atunuu e patipatia le sauniga o le faapaiaina o le eleele na iloa ai le tele o le fanua o lea ua maua e le ekalesia o le Taeaoafua e faatinoina ai ana galuega, e pei o le malumalu, o le hall a le ekalesia faapea ma le maota o le galuega.

O le faalaeiau a le susuga i le taitai o le sauniga ia Petaia Lokeni i le paia o le ekalesia o le Taeoaoafua i Magele e faapea, o tatou o tupe a le Atua, e le fausiaina le malumalu o le Atua i upu ae fausia i tupe, o tatou o tupe e sailia mea e fai ai le galuega, ia finau ma ia finau aua le fiu, e iai taimi e sau ai le musu, e iai le taimi e lafoai ai aupega o le taua, ae ia taula mea uma i le Atua e foai mai ai tupe mo le galuega. Ia maua e le ekalesia le galulue fesoasoani i le latou faifeau ma ia savavali ma tumau i le faatuatua i le galuega a le Atua.

O lana saunoaga faafetai i le susuga i le faafeagaiga ia Sean Palala ma lona faletua ia Faufau Palala ona o le loto tetele i le galuega, o lea faatoa tasi le tausaga ma masina o le mafutaga ma le ekalesia o le Taeaoafua i Magele ae o lea ua galulue punouai mo le fausiaina o le malumalu. E manomia e le Atua ni faifeau e galulue ma fai lona finagalo.

O le susuga i le faafeagaiga ia Sean Palala ma lona faletua ia Faufau faapea le tina matua o le ekalesia ia Efo Tafunai na latou tutu’iina le uluai suo i le eliina o le eleele mo le faapaiaina. O le susuga foi i le faafeagaiga o le ekalesia sa ia saunoa faafeiloai le mamalu o le saofaiga a susuga i faafeagaiga ma o latou faletua faapea le mamalu o le auvalaaulia sa auai, ae o le susuga i le failautusi o le aulotu ia Faasii Faata Vaeluaga sa fai ma fofoga o le aso ma faia faaaloaloga i le taimi na mae’a ai le taumafataga.

Falesa tuai a le EFKS Taeaoafua i Magele

Falesa tuai a le EFKS Taeaoafua i Magele

Tala puupuu o le galuega

Pe tusa ma le lima tausaga talu ai, na iai le alutou lenei i lalo o le faamalu o le EFKAS i Tutuila peitai ane ua a’e se tofa i le ekalesia o le Taeaoafua ua tatau loa ona faaofi mai le aulotu lenei i lalo o le faamalu o le ekalesia EFKS i Malua, lea e pei ona iai i le taimi nei.

O le tausaga e 1993 na fausiaina ai le malumalu tapuai lenei i lalo o le taitaiina a le susuga i le faafeagaiga ia Tirisi Taumanupepe i le EFKAS.

O le tausaga e 2017 ia Novema na osi feagaiga ai loa le susuga i le faafeagaiga ia Rev Sean Palala ma lona faletua ia Faufau Palala ma le ekalesia lenei o le Taeaoafua, ma amata ai loa ona fuafua le fausiaina o le galuega. I le fautuaga na tuuina mai i le ofisa o le Council ua tatau ona tuu i lalo le falesa lenei ona ua fai si tuai ma ua leaga foi, ma o lea sa amata ai loa ona galulue le ekalesia ma le susuga i le faafeagaiga ia Fepuari i le tausaga ua mavae 2018 e faatino sailiga seleni ma fai apalai e ala i pemita ina ia mafai ai ona fausia le galuega.

O le loto fuatiaifo e ala i le atina’e a le ekalesia i Aso Sa taitasi o tupe malosi lea sa maua i le loto foai ma le loto galulue o tagata i le Atua, faatasi ai ma po siva sa fai i ogatotonu o le tausaga lea sa maua ai tupe nei ua fausia ai le galuega. I le lagona o le susuga i le faafeagiag e ese foi le ola galulue o tagata ma le loto foai o tagata i le galuega a le Atua.

I le taimi nei ua fai si taugata o le soifuaga, peitai o le galuega ua leva ona fuafua mai e le ekalesia ma o loo iai foi le loto tetele o tagata e faatino le galuega ma le faamoemoe maualuga e tupu le loto foai ma le galulue faatasi ona ua vaai atu ua tino mai se galuega.

O le faamalosi a le susuga i le faafeagaiga ia Rev Sean Palala i lana ekalesia ia paleni le paketi a aiga lolotu i aiga ma le ekalesia, aua ne’i mamafa itu tasi, a fai le faasoa a le aiga ia ave le faamuamua i le mea e tatau ona faamuamua, ona o le atunuu o loo iai e tupe lava mea uma, o lea lava la se tupe e totoe o le tupe lena e faaatoa mai e le Atua aua lana galuega.

E 28 aiga lotu o le ekalesia o le Taeaoafua, ma o le Aso Gafua 14 o Ianuari lea na amata tuuina ai i lalo le malumalu tuai ae amata ai loa le galuega fou.

E lē o iai se lagona o le susuga i le faafeagaiga ma le faletua faapea le ekelesia e faavavevave le galuega e tuu pea ia fai ia maea lelei aua o loo iai le faamoemoe, e fia fausia le malumalu tapuai faatasi ai ma le hall, ae a mae’a o loo lava ma totoe le paketi a le ekalesia ona fau ai lea ma le maota o le galuega.