O le taimi muamua lenei ua see mai ai i Aukilani le sailia poo le filifiliina o ni tama taaalo mo le ‘au a le atunuu o Samoa le Samoa A. O le faamoemoe lea, mo tama taaalo sa masani ona fai i Samoa i le tele o tausaga peitai ane, ua talosagaina e le Iuni Lakapi a Samoa le Iuni Lakapi a le Aukilani Samoa, ina ia mafai ona fesoasoani atu i le filifilia lea o ni tama taaalo auā le tapenaina o le Samoa A.
Ma o le filiga o tama taaalo e faia mai lea i Aukilani ma le faamoemoe ia maua e le Aukilani Samoa le 80% o tama e tatau ona auai i le ‘au mo taaloga e pei ona tapena iai le Samoa A. I Samoa ua uma ona filifili ai nisi o tama taaalo mo le ‘au, ae pei o le agaga maualuga o le pulega o le Samoa A i lenei tausaga e tatau ona filifili atu foi ma nisi o alo ma fanau o loo i atunuu i fafo e pei o Niu Sila.
O le malaga mai o nisi o le Iuni Lakapi a Samoa i le tausaga ua mavae na iloa ai le tele o le agai i luma ma le maopoopo o le Iuni Lakapi a le Aukilani Samoa, ma o le tasi lea auala ua mafua ai ona a’e se lagona i le Iuni Lakapi a Samoa e fesootai mai i le Aukilani Samoa mo lenei faamoemoe ona o loo maopopo lelei le Iuni a le Auklani Samoa ma e faafaigofie foi ona saili ai tamaiti.
O Mati o le taamilosaga lea a le Pacific Challenger Competition e faia lea i Fiti e aofia ai la le Samoa A, Tonga, Fiti ma le Junior Japan. Ua tuuina mai le tusi a le Iuni Lakapi a Samoa i le Aukilani Samoa i Niu Sila nei ina ia mafai ona latou fesoasoani atu i le sailia lea o ni tama taaalo mo le ‘au a le atunuu o lea ua tapena, ma o le agaga maualuga e tatau ona maua ni tama lelei ina ia mafai ona ausia e le ‘au a Samoa le taamilosaga lenei e manumalo ai i le amataga o lenei tausaga. E 23 tausaga le matutua o tama o loo manaomia faasolo ifo i lalo.
Talia fiafia e le Iuni Lakapi a le Aukilani Samoa le valaau
E lei teena e le afioga i le peresitene ia Tapuai Siaosi ma lana komiti o le Aukilani Samoa le tusi talosaga mai a le Iuni Lakapi a Samoa, ona o le lagona ma le manatu o le afioga i le peresetene o se avanoa lelei lenei e fesoasoani atu ai i le tauau o le Iuni Lakapi a Samoa aua le faaleleia atili o ‘au a le atunuu, aemaise ai o le avanoa ua maua e tama taaalo uma a le Aukilani Samoa e agai mai ai e saili so latou avanoa i le Samoa A aua se ai mo le atunuu. Ua tapena le Aukilani e talimalo i lea faamoemoe i le faaiuga o le vaiaso nei i le Aso Toonai 19 o Ianuari e faia ai le filifiliga o ni tama aua le tali atu i le tusi mai Samoa. O le’a mafai foi ona auai mai ai ma le pulega a le Samoa A mai Samoa e faia le filifiliga o tama taaalo faatasi ai ma le faiaoga a le Manu Samoa o loo iai nei. O le Aso Gafua, Aso Lulu ma le Aso Tofi e faia ai koleniga a tama taaalo ua tusi lima iai le Aukilani Samoa e auai i lea faamoemoe, i le malae i Papatoetoe Rugby Club, ae o le Aso Toonai e faia lea i le malae i tua o le Pack n Save i Magele, ma iloa ai loa i latou ua filifilia mo le ‘au a le Samoa A.
Faailoa e le afioga i le peresetene ia Tapuai Siaosi ua iai nisi o sui mai Ausetalia ma Kalaiesetete o lea ua fia auai mai i le sailia o tama taaalo o le Samoa A, ma ua iai foi le lagona o le komiti e tatala iai le avanoa e auai mai ai aua se ai mo Samoa ma lana ‘au i lenei tausaga.
