Ua faate’ia nisi o faafeagaiga EFKS ina ua agai atu i le faletupe o loo faia ai a latou teugatupe, ua aveese sa’o e faletupe le aofai o latou lafoga o loo nofo aitalafu ai i le malo.
O se tasi o faafeagaiga o loo galue i se tasi o falesa i le talafatai o Apia, na ia faailoa i lana aulotu, lona faate’ia ina ua agai i le faletupe, ae faailoa ane e $5000.00 ua aveese mai lana teugatupe, ona o le lē totogia o lana tax.
O le faamatalaga foi lea a se tasi o paaga a le tusitala, e faapea na faasalalau e le latou faifeau, i luma o le latou aulotu, ua aveese lana tax. Ole toe fiti ane o faifeau EFKS e saili ma tau faatalanoa poo le ā se latou gaioiga e fai e tali atu ai i le malo, ona o le aveese e faletupe atoa ai ma le matagaluega o tupe maua a le malo, o latou lafoga le totogia mai i le malo, o se gaioiga ua tuai.
Ua finau mai le malo, ua tele avanoa ua tuu i faifeau EFKS, talu mai le amataga o le faatalanoaga o le faamoemoe o le malo i le toe faaofi lea o le totogi lafoga a faifeau atoa ai ma le Ao o le Malo.
Ua finau foi le malo, na oo lava i le toe tolopo ma faaopoopo aso e toe agai atu ai faifeau EFKS e faatalanoa le mataupu, ina ia maua le tasi ma lagolagoina le tulafono o tupe maua peitai e lei mafai ona gauai atu finagalo o faifeau EFKS.
O ia avanoa, ua mae’a le taimi na faatino ai le malo, ma ua tatau loa ona faatino le tulafono e pei ona pasia e le Palemene. O le tausaga lenei, na agai atu ai taitai o le ekalesia EFKS ma feiloai i le malo, ma o se tasi o vaega o lenei feiloaiga, ia toe tuu atu se isi avanoa mo faifeau EFKS e faatalanoa ai le mataupu pe a usuia le fonotele i Malua i le tausaga fou.
O le mau a toeaiina, e na’o le fonotele a Malua e mafai ona toe sui ai se mataupu ua mae’a ona pasia.
E pei la o le mataupu lenei i le totogi lafoga o faifeau ua mae’a ona pasia e le fonotele a Malua, lo latou tetee i le tulafono. O le mau a le fonotele e lē talafeagai, ma sa o latou valaauina ai le tagata lotu uma ia tutu faatasi e tetee atu i le malo ma le tulafono.
E le gata i lea o le tusia lea o se tusi ma tuuina atu i le malo e faaali ai lo latou tetee i le tulafono a le malo.
O le feiloaiga foi lea a le Palemia ma taitai o le ekalesia na o latou faaali ai i le Palemia, o loo taatia le isi laasaga e mafai faatino, e pei o le valaauina lea o ekalesia, e tuufaatasia latou aao mafola, ae tuuina atu i le malo, ae ia aua nei totogiina lafoga a faifeau.
O le saunoaga a le Palemia na saunoa ai i le feiloaiga ma taitai o le Ekalesia, ina ia agai e tusia se latou tusi ona toe agai atu lea, peitai e lei faia lea tulaga sei vagana ai le faasalalauga faalauaitele a le failautusi a le ekalesia i luga o le televise a le ekalesia.
Saunoa le failautusi Vavatau Taufao, e lē mafai ona o latou suia se mataupu ua mae’a ona pasia e le fonotele, ma e faatali pea seia aumai se finagalo o le fonotele pe a usuia le fonotele i Malua i le tausaga fou.
Peitai ua faailoa nisi o finagalo o nisi o aulotu, ua o latou faaali lo latou finagalo alolofa io latou faifeau, ua malilie e aveese lafoga a faifeau ma o latou lagolago le finagalo o le malo.
“O le faafitauli, o loo feteenai le aulotu ma le faifeau, o nisi o faifeau o loo tamau pea o latou finagalo e faatali le faaiuga a le fonotele, ae o loo finau atu aulotu, ua malilie e totogi lafoga, mai io latou alofa ona o le manumanuga ia aua nei ta’uvalea o latou faifeau, ‘ona o le tulafono ua pasia.”
Peitai poo fea e fai iai finauga a taitai o ekalesia e tetee i le tulafono ma sei faatali le fonotele i Malua ua amata ona faatino le tulafono, ma o le a faasolo atu lava ina faatino loa le faiga faafalepuipui pe a lē usitaia. O loo aiaia i lalo o le tulafono, le faatagana e ao sa’o lava e le matagaluega o tupe o lafoga a faifeau mai i faletupe.
