Na faavaeina le Ekalesia Hosanna Brisbane Church i le 2009 ae faatau lo latou fanua i le 2011. E 1.6 miliona le tau o le fanua e 4 eka le telē lea la ua faataoto nei le galuega a le Ekalesia i Forest Lake ua amata na galuea‘ina ma le faamoemoe e 6 i le 7 masina e fausia ai le falesa ma vaega uma e moomia.
O le tau atoa o le falesa ma le hall ma isi vaega e ese mai le fanua e 3 miliona. Tele ni vaega tāua o lea galuega o loo fuafua i ai le susuga i le faafeagaiga, o le taitai aoao foi lea o le ekalesia Hosanna i Ausetalia ma Niu Sila le susuga ia Pr Asafo mai Salelologa ma le faletua ia Helen Avia mai Samusu ma Luatuanuu.
Saunoa Pastor Asafo Avia o le faamoemoega o le ekalesia ina ia mafai ona faaaogā e le mamalu o le atunuu aseta a le ekalesia i se tau taugofie, ae o se ogatotonugalemu mo fuafuaga faaalualu i luma o le galuega a le Atua.
O se tasi lea itu sili ona faafiafiaina auā o loo moomia pea e Samoa i le tele o meafai i vaiaso uma ni hall tetele auā faamoemoe o le atunuu.
