O le faamoemoe ola ma le anavatau tauave a le Ekalesia Faapotopotoga Kerisiano Samoa (EFKS) o le “Ola ia Keriso”. O le tapueina ma le aputiputiina lelei mai lea o alo ma fanau, le tupulaga talavou ina ia iloa ona ola e fiafia i le Alii.
O le vaitau lava lenei o le lotu faamanatu a tupulaga a le Pulega a Manukau i Sasa‘e lea ua taitaina nei e le susuga i le tama toeaina, Susuga Rev. Silo‘a Iosua Lologa ma le faletua le tina o le Pulega ia Lotofoa Iosua Lologa.
O le Aso Toonai la na faataunuuina ai lea fuafuaga tāua i le maota o le galuega i Weymouth le Savali o le Filemu Hall. Na faatumulia lea faamoemoe i autalavou e 9 mai aulotu o le Pulega faapea le taupati mai o tagata lolotu o aulotu taitasi aemaise foi o le maimoaga ma le faafofoga a nisi o malo asiasi sa mafai ona auai atu e molimauina le polokalame faaauau a autalavou o lenei foi tausaga.
Sa faatāua ai le ola ia Keriso o tupulaga e ala ia latou pesepesega, o siva faaleagaga ma faaevagalia. Na faia foi ni faatalatalanoaga ma fesili ma tali i mataupu lautele ma le poto salalau o le Tusi Paia aemaise o le lotoifale o le Ekalesia.
O lea foi mafutaga na mafai ai ona maua le avanoa mo isi o faatalatalanoaga mo le fia malamalama atili o tagata lautele aemaise o le tupulaga talavou i nisi o alaga manuia e mafai ona latou faaaogāina ma auai atu i ai ina ia faatāuaina pea mafutaga e atagia ai le ola ia Keriso ma le lumanai i le ola malamalama o tupulaga e finauaina ai le ola mo Keriso.
O le isi vaaiga sili ona tāua ma faamalieloto, o le galulue faatasi o susuga i faafeagaiga ma o latou faletua i le faamalosia pea ona aumai le faamalosiau i tupulaga e ala i lo latou faatinoga o le aumaiga o le feau o le tala lelei.
Na matuā faatinoina lava e faletua nisi o pese ma siva ae aiaiuli malosi ai le susuga i le tama toeaina ma o se vaaiga na faamautinoa ai le faatāuaina tele o le mafutaga a tupulaga o le Ekalesia mo a taeao.
Na faaiuina le polokalame i le taumafataga na faatofusia uma ai tagata lautele ma autalavou aemaise o le taliga o le sua i le susuga i le toeaina le tamā o le Pulega ma le faletua aemaise o susuga i faafeagaiga ma o latou faletua, ma ta‘ape ai loa le filialii i le fiafia ina ua manuia le faamoemoe ma fuafuaga uma i le faatasi mai o le Atua.
