E lē tau faailoaina le tautua matavela a le kamupani a Eveni i Samoa, auā o se tasi lea auaunaga ua leva ona faatauina le tele o laei ma ie sii atoa i totonu o le atunuu, ae lē gata i lea o le tele foi o matagaluega ma kamupani o loo latou faaaogāina lea tautua e ala ia latou togiga faigaluega, faapea foi ma aoga. O le lalelei ma le matagofie o le laei a Eveni, ua lē gata ai i Samoa lana tautua ae ua mafai ona ofi mai ai isi atunuu o le lalolagi e pei o Niu Sila.
O le afiafi o le Aso Lua ua mavae, 4 o Aukuso na tatala aloaia ai le Elei lenei a Eveni i totonu o Aotearoa i Ponsonby Central i Ponsonby. Na auai le afioga i le Konesula o Samoa ia Faolotoi Fatialofa Reupena Pogi, faapea le amepasa o Samoa i Europa le afioga ia Fatumanava Pa‘olelei Luteru ma lona faletua ia Pepe Luteru, sui o kamupani taitasi faapea uo ma ē masani o loo galulue ma faipaaga ma le Shop Samoa a le susuga ia Rasmus Pereira ma lona faletua ia Malu.
Na tatala aloaia le faamoemoe i le saunoaga a le afioga i le Konesula e ala i le tautua ma le auaunaga a Eveni e pei ona iai i Samoa i le tele o tausaga, ma faagasolo ai loa le polokalame ma le maimoa a le mamalu o le atunuu sa auai i ofutino elei sa iai.
Sa faapea foi ona faailoa ai ma faguu ma lotion a le Mailelani Samoa a le faletua ia Cathy Johnston. E ese foi le matagofie ma le tāua o lea po i le toatele o le atunuu na auai, auā o le avanoa tāua ua mafai ona faailoa nisi o oloa mai totonu o Samoa.
Sa faapea foi ona tapenaina le taumafataga i lea afiafi e le Shop Samoa faapea fesoasoani a nisi o tamalii o le atunuu, le Kia Ora Sea Food le susuga ia Henry Soagia faapea le faletua ia Faga o le Talimanao.
E toatele foi i latou sa faatauina laei i lea po aemaise o i latou uma sa auai sa tusia o latou suafa e ave mo le Se‘i e manumalo ai i nisi o meaalofa.
O le Shop Samoa o le kamupani autu lea a Eveni i totonu o Niu Sila, ma na o latou foi o loo faatauina le elei lenei i tagata. O Mati i le tausaga lenei na taunuu mai ai le laei, ma amata faatauina loa i le Pacific Festival seia oo mai lava i le taimi nei, a o lea faatoa aloaia le tatalaina i totonu o lenei atunuu.
O Eveni sa latou saunia le laei sa malaga ma toe foi mai ai le Olopeleki i le la taaloga ma le Manu Samoa, faapea foi ma le laei a le Manu. Ae ua tele foi nisi o kamupani ma faalapotopotoga ua faatoai a latou togiga i le Shop Samoa, e pei o le G-Mana Wholesale Autos, Radio Samoa ma le Samoa Times, faapea le mafutaga a Malisi.
Ta‘ua e le susuga ia Rasmus Pereira, o le pule a le Shop Samoa, o le faamoemoe lava o lana auaunaga o le faailoa ma tulei ai oloa a Samoa ma le Pasefika.
Ua lauiloa nei le Elei a Eveni i totonu o Niu Sila aemaise o le lalolagi auā o loo tele ina faatau e tagata i luga o le Online Eveni Pasific, Shop Samoa.
