E matuia ae louloua, uiga ma faiga a tagata o loo faia i nisi o latou aiga, o le faafaigaluega e aunoa ma ni visa e maua ai tupe, ae a faaletonu loa ua toe o ta‘u i le Immigration e toe tietie ai i le tipoti i Samoa.
O le faamatalaina e le alii pese ia Mr Gago i lana pese ua faaigoaina o le Tagi a le Overstayer, i le Aso Toonai ua mavae a o tatalaina lana CD Volume 7, o le mafuaga o lenei pese, na faateia ai nisi o tagata na tumutumu i le taulaga faatau a Magele e faalogologo ma molimauina lea faamoemoe, i le mafai ona faia e nisi o tatou tagata o lenei mea.
E foliga mai ai i lea fatufatuga ua faaaogā le tagata ona o le seleni ae leai se alofa moni o taoto ai. Afai ou te tautala i Gagana a Tagata atoa ma agelu ae leai sou alofa ua avea o se apamemea taalili poo se sumepalo tagitagi.
O le mafuaaga lea ua faaigoa ai foi lea Volume 7 o le Tagi a le Overstayer seia avea o se faamanatu ma se feau molimoli mo tatou tagata. O le susuga ia Tauiliili Petelo Li‘a sa fai ma fofoga o le aso i le Aso Toonai, aemaise ai ua faafofoga ai foi le atunuu i nisi o pese a lea tamalii e pei ona iai i luga o ualesi faasalalau.
E sefulu pese o loo i totonu o lenei CD e aofia ai ma le vii o le aulakapi a le Apia Maroon lea a faamanatuina lona 20 tausaga. O le susuga ia Emmanuel Ensink ma lana fale pue pese o le EMMZ Recording Studio na ia tuufaatasia lenei taumafaiga, ma sa faapea ona faatauina ai ma le CD i lea aso i le $20.00.
Na maitauina le lagolago ma le faatau o le mamalu o le atunuu i lea aso, auā sa toe faatauina ai ma isi o ana Volume 1 e oo i le 6. A o le saunoaga a le susuga i le alii pese ia Mr Gago e lē o le tupe ae o le faaaogāina o le taleni ma le meaalofa ua tuuina mai e le Atua, ae lē gata i lea ia avea lenei musika o se faamalosi poo se feau tāua i tagata.
Na faaiu le tatalaina o le CD i le afiafi i le Club Royal e feiloai ai ma nisi o uo ma paaga e lei mafai ona auai atu i lea taeao.
