O le agaga faafetai tele i le Atua ma le loto faagaeetia e ao ai ona ave le viiga ma le faaneetaga e faamanuina ai le alofa ma le agalelei le ma faatuaoia o le Atua i lana tausiga mo oe le tina peleina Sooleoso So‘e. O le upu moni, o le tina e sili lona amio lelei, e sili atu lava lona tau nai lo o auro ma penina.
Faafetai tele Tina Sooleoso mo au galuega lelei uma mai lava i le faafaileleina mai o i matou uma la oulua fanau i le ulumatua e oo mai i le uii i totonu o si o tatou aiga. E leai ni auro poo ni ario matou te taui atu ai au galuega lelei uma aemaise o lou alofa faamaoni mo i matou uma seia oo mai lava i nai a matou fanau a (grandchildren).
Tina o oe lava o le pae ma le auli i taimi e lutia ai soo se tasi o i matou lau fanau i ni faafitauli o le olaga nei. Talofa e, ua loa lou soifua ma ua pulapula lagoto foi le matagofie o au galuega mo i matou, ui i lea tina, faafetai, faafetai auā ua malie o ma ua faasao ua malie le faga i lau i lau tausiga ma lou faitama ia i matou uma, ia saga viia pea le Atua ona o oe. Malo le onosai, malo le soifua faafetai mo lou alofa e lē uma…
O alofaaga ma faamanuiaga mo oe tina Sooleoso So‘e, ia alofagia pea lou soifua e le Atua ia na toe foai faateleina pea atu nisi aso ma nisi tausaga se tele i le lumanai e te soifua ai pea ma tautuaina lona finagalo i soo se mea. O alofaaga mo oe mai lau fanau uma lava i soo se vaipanoa o le lalolagi o alala ma papaaao ai, o lau fanau pele o loo outou mafuta pea i Samoa.
Alofaaga mai ou aiga uma lava i soo se vaega o le kelope, o fanau uma lava a au fanau. Ae faasilisiliina alofaaga mo oe mai ia tamā So‘e Tu‘itu‘ia.
