E leai se tagata e atoatoa sona poto ma sona lelei, e tāua foi le soifua faatuatua ae tatau lava ona vaavaalua ma galuega faatino.
O le soifuaga i nei talutalufou ma lenei vaitau, ua komepiuta (computer) ma masini mea uma, ua maitauina foi le faitau miliona o tupe sasaa a faigamalo a Ausetalia ina ia saga faaleleia atili komepiuta ma masini ina ia laina tutusa pea le soifuaga ma isi atunuu tetele o le lalolagi.
Ua avea foi lea ma tulaga ua siitia maualuga ai lea mataupu aoaoina i kolisi maualuluga ma faasolo atu ai i Iunivesite, ona soo se galuega lava e apalai i ai i vaitau nei e oo lava foi i le kiligi poo le salu lapisi se‘i tulou, e fai lava lau suega komepiuta.
O le itu lelei ma faamāmā avega o iai nei, o le sasaa lea o nisi vaega tupe a le malo e faatino ai polokalame ma aoga e aoaoina ai le mamalu o tagatānuu lautele i le komepiuta faatasi ai ma le gagana Igilisi, ona maua ai lea ma le avanoa e saili ai se tusipasi mo pisinisi laiti.
O le anavatau a le malo ina ia maua ma silafia le poto faakomepiuta, ma mafai ai ona iloa avanoa e amata ai ni pisinisi laiti.
O se tulaga lelei la o loo maitauina i le aai o Melepone, o le toatele o le mamalu ma le paia o lo tatou atunuu o loo faaauau le faatāuaina o nei avanoa e saili ai tusipasi Komepiuta ma le Igilisi, ua faaopopo i ai ma le tuualalo a nisi o faafeagaiga ma pule o nisi o matagaluega a le malo, ina ia saili ia maua ma tusipasi mo pisinisi laiti, ae se‘i amata aoaoina o tatou tagata i le silafia ma le tomai e amata ai ni pisinisi, e pei ona tufitaufao e tagatānuu o Saina ma Initia.
O le Aso Toonai, aso 23 o Aokuso na faauu ma tufa ai tusipasi a nisi o sui o le Ekalesia a le Shalom Worship Center o loo tausia e le susuga ia Pastor Ta‘a ma le faletua ia Pa‘i Faleao i le pitonuu o Campellfield, lea na o latou fai sauniga faatasi ai ma le susuga ia Pastor Osasa Aukuso mai Amerika Samoa ma ia tauaaoina ai tusipasi mo le aufaauu.
Ae o le Aso Gafua aso 25 na amata ma tatala aloaia ai se tasi foi o aoga mo mataupu lava ia i le pitonuu o Melton, o loo lagolagoina e le Samoan St Dominic Parish ma o loo vaaia e le afioga ia Taefu Si‘umalae Silao ma le faletua ia Maanaima, i le taitaiga a le susuga ia Ronnie Logova Toomata. Talosia ia amata maua ni faipisinisi e tauaveina le tagavai o Samoa i Melepone.
