O le vaiaso talu ai na faatoa amatalia ai i se aoaoga semina o le falelalaga a le Pasefika i Sini nei i le Hall a Arncliffe i Sini. O lenei polokalame o loo faauluulu i le tamaitai Samoa ia Serapina Salesa Caleo, Jess ma Alofa o le Three Bridges.
O le auga o lenei faamoemoe e lē gata o le faasoa atu i tupulaga Pasefika ma tina matutua o le tāua o measina a atumotu eseese ae faapea foi itu lelei mo le soifua maloloina.
O le lalagaina o fala papa, falalilii ma ietoga o se taleni e tatau na faasoa ma agavaa ai tupulaga i aso nei mo le lumanai ia ola ma faaauau atu i le isi meleniuma. Na faapupula lea mau i nai fanau aoga na auai auā lenei augatupulag ma luma atu. E le gata i lea o itu lelei mo le tausia o le malosi o le tino ma le mafaufau.
E le taumate o sui mai atumotu e e pei o le Atu Kuki, Fiti, Toga, Niue, Samoa, Maori ma Tokelau o loo aumau i Sini ma Ausetalia nei e misia lenei galuega. O le galulue faatasi i o latou atunuu i le tapenaina, faamagoina ma le valiina aemaise le lalagaina o fala ma ie eseese e moomia ai le galulue faatasi ma faasoa. O lenei tiute e aofia ai le faasoa o manatu ma silafia aemaise talanoaga e fafagu ai le mafaufau ma fesootai ai i totonu lava o se falelalaga.
Saunoa Serapina Salesa Caleo o le mafutaga lenei faapasefika e tāua tele mo le tumau o le malosi o le tino ma le mafaufau e misi pe a siitia mai i atunuu i fafo. O nisi lava ua lē toe feiloai i nisi tagata o la latou atunuu e talanoa ma taliē ma maua ai le fiafia o le loto. E le gata o le telegese ai o le mafaufau ae e vave maua ai i gasegase o le tino.
Sa faia foi se faaaliga matagofie i le mamalu na auai o fanau ma mātua i nisi o ietoga, fala ma galuega taulima mai le Pasefika i lea semina ma amata faamasani ai le aofia. Ua valaaulia nei nisi o fia auai i lenei polokalame e faafesootai Serapina Salesa Caleo i le numera 9503 9903 i taimi faigaluega.
O taumafa paleni mai le Pasefika na talisua ai le aofia saunia e le auaunaga a le Polynesian Umu Cooker. O le aso 5 o Setema e toe faia ai le isi fonotaga a lenei vaega tāua i Sini nei.
