Ua toe tasi nei le vaiaso ona faatauina lea o le vaega tolu o le Toe Foi Tama Savaii, lea o loo faatali i Thailand lona tipiina.
Ae o le Aso Faraile 29 o Aukuso ma le Aso Toonai na faalauiloa ai lenei ata i le Art Centre i Magele, lea sa molimauina ai le tumutumu o nai tamā ma tina matutua aemaise ai foi o tupulaga.
E faalua ona faaali le ata i nei aso e lua, o le 9:30 i le taeao ma le 12:30 i le aoauli, e faatatau ia i latou o loo pisi i feau ma galuega. I le Aso Faraile lava latou e lei taina le iva ae ua leva ona nonofo nai mātua matutua i le fia maimoa i le ata.
Na faaali foi se finagalo o se tasi o tina matua sa iai, e lē manao e ta‘ua lona suafa, e manaia tele nei avanoa mo i latou matutua e tafafao ai mai le nofonofo i le fale.
O le Aso Toonai na molimauina ai loa le toatele o i latou na agai atu e fia maimoa i le toe foi o le Tama Savaii, auā ua malolo mai i tiute o le vaiaso faapea foi aoga a le fanau. O le tele o ticket na faatauina i le faitotoa.
E silia i le 600 tagata na molimauina lenei ata i aso e lua, auā foi o se tasi nei o ata tifaga o loo tulituli pea e le toatele o le atunuu e fia matamata ai, auā o loo mafai ona pueina sa‘o mai lava i Samoa aemaise o mea o loo tutupu i totonu o aiga ma afioaga.
Ae na ta‘ua e le tatou lomiga e lei mamao atu e toe tasi le vaega o loo totoe o lenei ata, e iai le faamoemoe e faalauiloa mai i tua i le taimi o le Kerisimasi.
