I le mae‘a ai o tapuaiga masani ai le toatele i Aso Sa, ae amata gasolo le toatele i le maimoaina o le taaloga i le va o Aukilani ma Tasman i Eden Park i le aoauli o le Aso Sa na tea nei, ma o lea foi taaloga na taualugaina ai taaloga o le round lona tolu o le taamilosaga o le ITM CUP 2014.
O lea taaloga na masalomia atonu e matuai faatoilaloina nei e Tasman ia Aukilani ona o le lelei tapena o le au a Tasman i nisi o taaloga ua mavae atu. Peitai ane e lei vaaia lea tulaga ia Aukilani, masalo ona o le malosi tele o le laina i luma a Aukilani i sikalamu ae finau pea Tasman e ui o loo toatolu alii All Blacks o loo ia Aukilani, masalo o le uluai 16 minute o le taaloga na vaaia ai le tulai mai o Tasman malosi i ana osofaiga nai lo Aukilani.
O le sikoa a le alii o Quentin MacDonald o Tasman foliga mai ona o le faatamala o le alii o Steven Luatua ma le alii o Charles Piutau, ae o se taaloga matagofie tele, tusa ai ma faamaumauga o le alii ia Marty Banks, e lei iloga foi lona tulai mai i ai o le taaloga i lona tomai faakikipolo e pei ona o loo talitonuina e ono maua le luasefulu ai i le taaloga ITM Cup, ae e lei mafai ona ausia lea tulaga i lea taaloga, faapea foi le taumafai atu o le alii o Simon Hickey o Aukilani.
O se taaloga sa taufao lava seia oo lava i minute mulimuli o lea taaloga, masalo o le 60 minute o le taaloga lea na sikoa ai le alii o Steven Luatua ma tulai mai ai ‘ai o le taaloga 16 Aukilani ae Tsaman 13.
E latalata lava i le mae‘a ai o le taaloga ae faasala loa Aukilani ma faaopoopoina ai loa ‘ai a Tasman i le sala na aaina e le alii ia Marty Banks o Tasman ma tutusa ai loa ma le taaloga.
Na faaiuina le taaloga Aukilani 16 Tasman 16.
O le vaiaso nei e feiloai ai Tasman ma Waikati i Nelson i le Aso Faraile, ae felioai Aukilani ma Wellington i Aukilani i le Aso Toonai.
