O le logo mālie ma le faamomoiloto o pesepesega opela a le aufaipese Pasefika a Sini i le faafiafiaga a le Pasefika i Casula i le vaiaso talu ai, na lē gata o le faatoa faafofoga ai le mamalu o le aumaimoa i nei ituaiga pese, ae na matagofie atili i le faaopoopo i ai o pese Samoa, faaleagaga ma pese aualofa.
E silia ma le lua masina o tuufaatasia lenei aufaipese ma o le faatonu ia Robert O’Brien o se alii Samoa/Tuvalu ua iloga i aufaipese faalevaomalo na nafa ma le faatonutonuina. O le susuga ia Simon Kenway mai le Opela Ausetalia e masii mai i vaiaso taitasi e a‘otauina nei tamalii ma alo o le Pasefika mai Toga, Samoa ma Maori.
E lima Pese na usuina e lenei aufaipese ua faaigoaina o le Casula Voices ma na faateia le aofia i le amatalia i le pese Opela iloga o le ‘Pie Jesu’ lea e silafia uma e le lalolagi o nei pesepesega.
O le tamaitai ia Ballina Gee le ‘i’ maualuga o le aufaipese na taimia le pese. Na matuā pati ma po le aofia i le maualuluga ma le manitiniti o siufofoga o le aufaipese. O se taimi muamua lenei i Sini ua toatele ai ni alo o le Pasefika ua tuufaatasia.
Na sosoo ai ma le viiga ‘Faafetai i le Atua’ mai le tusi pese a le EFKS. O le isi pese o le Kumbaya faapea le ‘Good Night Dear Heart’ na tusia e le tusitala Amerika iloga ia Samuel Clemens lea na tusia Tom Sawyer ma Huckleberry Finn.
Na taualuga i le pese iloga a John Farnham o le ‘Voice’ lea na solo ai le alii Samoa o Joe EFKS faapea le alii maorio o Khane Whenua. O le taualuga o lea aso na valaaulia ai e nisi o faalapotopotoga le aufaipese mo ni a latou faamoemoe o fuafua.
E lē gata i lea na tauaaoina atu ai se valaaulia a sui o le Fono Aoao a Liverpool (Council) e fia avea lenei aufaipese ma a latou Amepasa i Sini nei. O loo talitali se finagalo o le faatonu ia Robert O’Brien i se faaiuga o lea valaaulia e ui e lei atoa se ono masina talu ona tuufaatasia.
