E tofu atunuu ma laei e iloga ai, o nisi foi atunuu o le tagavai poo le fu‘a ua fai ma lanu o laei ua tautaua ai, ae o upu tuutaliga mai tuaa, o le malofie poo le tatau a le tamalii Samoa ma le malu a le tausala, o laei Samoa moni ia.
O se mitamitaga sili foi i le paia ma le mamalu o soo se Samoa, pe a mafai ona laei i measina ia a le atunuu, e uigaese foi le lalelei ma le mamalu o la tatou lea aga i fanua, pe a faatusatusa i aga i fanua a isi o tatou uso a Pasefika.
O le Aso Toonai, aso 5 o Oketopa na faapaiaina ma samaina ai malofie a nisi ia o tamafanau a Samoa, ua laei nei i le laei Samoa moni, faafetai ai i le Agaiotupu, aemaise le afioga Misa Ape Sofara mo le finagalo i measina a Samoa.
O i latou na samaina a latou tatau i le aso lima o Oketopa, o le susuga Jonas Matamua, Ata Matamua, Tomasi Tusitala ma Arme Maeli.
Ona oo lea i le afiafi foi o le Aso Toonai, aso 19 o le masina lava lenei o Oketopa, na potopoto faatasi ai tauaiga, uo ma ē masani, i le sauniga o le samaina o tatau ma malu a nisi ua faatoa mae‘a ona laeiina i le laei Samoa.
E pei ona masani ai aso faapenei, na muamua lava le viiga ma le faamanū i le Tapaau sili e ala i le sauniga na saunia e le susuga i le a‘oa‘o ia Misa Ape Sofara, ma faagasolo ai le afiafi matagofie ma le tāua i nai o latou aiga, le atunuu, aemaise lava o le faaeaina ua siitia i ai o latou soifua.
O le maota o le susuga ia Falatunatuna Fuimaono i le pitonuu o Narre Warren na faataunuu ai le faamoemoe. O le Fofoga o le afiafi o le afioga a Misa Fiaola Teeupu Nanai.
O faaaloaloga ma le agaga faafetai na molimoli i le agaiotupu ma le galuega fitaituga na feagai ai le susuga ia Tulouena Mareko, ae o le atoaga ma le autū o le afiafi, na taulai uma ia i latou ua faalaeiina, o le susuga ia Falatunatuna Fuimaono o Salani Falealili, Tauamanu Te‘o mai Vaiee Safata ma Fiapule Te‘o Rimoni o Vaiee Safata.
Oka se lalelei ma malualii o nei tamalii ma tausala o le atunuu i o latou laei. Na ta‘ape fiafia le paia o Samoa, auā ua outou manumalo.
