Se mea ina a matuā lelei ma le matagofie lava pe a nonofo faatasi lava o uso, ua lē gata ina faatusaina i se suauu lelei, ae mafai foi ona faapea se faamatalaga, e lapotopoto le lalolagi e toe foi mai lava ma toe tauia sau galuega fesoasoani.
O le Aso Toonai aso 26 o Oketopa na faataunuuina ai le tausala a le Ekalesia Metotisi a Logan City lea o loo tausia e le susuga ia Rev Moloka ma le faletua ia Uaine Toleafoa. E 16 matafale ae 5 matafale fesoasoani, tusa ma le 150 tagata lotu.
O se tasi lenei o aulotu o le faasinoti ua toeitiiti mae‘a le Ala o le Atua auā tapuaiga i Aso Sa. Na manuia le faamoemoe o le aulotu auā sa lagolago e aulotu uma o le Sinoti faapea nisi ekalesia, tauaiga, uo ma ē masani sa auai ona o le fia opogi o le faamoemoe.
Na momoli le agaga faafetai o le sui o le aulotu faapea le faifeau i le paia o Samoa sa auai ona o lenei seleni paia e $88,098.00 le aao foai, na faatagisia ai le fesoasoani auā le malu o le Atua ma nisi faagaioiga o le galuega. O le failautusi lava a le matagaluega sa fai ma fofoga o le aso, le afioga ia Mapuilesua Eki.
O Faatoatoa Iosefa sa ma sui e momoli se agaga faafetai mai le matagaluega, ae o le tulafale alii ia Tuiloma Faiaga Puletiuatoa sa tali fuaitau e fai ma sui mai le auvalaaulia ma le ekalesia EFKS e pei ona auai foi le susuga ia Isamaeli Liaina ma le ekalesia EFKS ona o le maualuluga o faaaloaloga a le ekalesia a Logan City.
