O se vaaiga uigaese na faateia ai le mamalu o le atunuu ma le auvalaaulia na latou molimauina le tatalaina o le hall a le Ekalesia Assembly of God Church of Samoa Auckland i Magele i le Aso Faraile ua mavae.
Na suia ai lagona o le tiga i le fiafia ina ua faaulufale le latou galuega sa gapatia ai i le tele o tausaga. Na amata le polokalame i le sauniga lotu, sa taitaia e le susuga i le Aposetolo ia Talosaga Kome mai i Porirua, o ia foi o le taitai aoao o le ekalesia i Niu Sila, Samoa ma Ausetalia.
O le ootiina o le lipine na nafa lea ma le faletua ia Sera Kome; na mae‘a ona tauaao atu lea o le ki o le fale i le Aposetolo mo le tatala aloaia o le faitotoa auā le faaulufaleina o le maota.
O le taitai o viiga o le sauniga o le susuga i le faafeagaiga ia Ieremia Tuumatavai, ae o le laugaina o le Afioga a le Atua o le susuga lava i le faafeagaiga ia Talosaga Kome.
Na momoli ai foi le faafetai a le taitai, i le susuga i le faafeagaiga ia Fereti Toleafoa ma le faletua ia Rebekah ma le ekalesia e tusa ai ma lenei galuega tele sa latou punouai ai. O le susuga ia Fereti ma le faletua o i laua foi ia o tausioloa a le ekalesia aoao.
E silia i le tolusefulu susuga i faafeagaiga ma o latou faletua sa auai, ae e lē itiiti ifo ma le toluselau le mamalu o le auvalaaulia na molimauina lenei faamoemoe, ae na saunoa le susuga i le faafeagaiga ia Fereti Toleafoa, e $1,420,000.00 le tau o le fale, ona latou totogiina lea o le $800,000.00 mo le tiposi. E $186,000.00 na toe faaleleia atoa ai le galuega.
O lenei fale i lona toe faamatagofieina e leai sona aitalafu o iai. O le fiafiaga foi i le faafeagaiga, ua fetaui lelei lava le tatalaina o le latou galuega ma le fono aoao a le ekalesia sa faatinoina i le faaiuga o le vaiaso, lea sa fai ai le filifiliga o tofi, ma ua toe tulai mai ai le susuga i le Aposetolo ia Kome ma le faletua ia Sera i le tofi taitai aoao; o loo galulue nei i laua i Porirua.
O sui taitai o le susuga i le faafeagaiga ia Tuulalo ma le faletua ia Christina Gago i New Lynn. O le failautusi o le susuga i le faafeagaiga ia Ieremia ma le faletua ia Mele Tuumatavai i Petone.
O le teutupe o le susuga i le tausi matagaluega ia Fereti ma le faletua ia Rebekah i Magele, ma le toeaina o le susuga i le faafeagaiga ia Taofiga ma le faletua ia Tusiga Peseta i Masterton.
