O le Hall a James Meehan i Macquarie Fields na faatautaia ai foi i le vaiaso talu ai le tusigaigoa a le afioaga o Poutasi i Falealili lea na ausia ai le fitu sefuluvalu afe ma le fituselau tala.
Na faailoa mai e le Fofoga o le mafutaga ia Niu Kosema Tumanuvao le auina mai o se faatalauula mai Samoa i le afioga i le Patele Faauli ma le Ekalesia o le afioaga mo se fesoasoani.
O le autū o le toe faaleleia lea o le malumalu Katoliko i Poutasi ua faaletonu talu mai aafiaga o le tsunami faapea afā talu ai. Ua amata ona lē saogalemu mo le mamalu o le autapuai.
Na amata le faamoemoe o Poutasi i se sauniga na taitaia e le afioga ia Patele Tietie ma faagasolo ai loa peleti eseese faapea le lagolago mai a uo ma ē masani. Na masii mai nisi o le afioaga mai setete eseese o Ausetalia, Niu Sila ma o se avanoa na toe feiloai ai ma aiga ma uo i Sini ua leva ona valavala.
O se aso foi na vaaia ai le tuputupu ma uluola o le augatupulaga laiti o Poutasi na masii mai ma o latou mātua auā le faamaopoopoina o lenei faamoemoe.
Na saunoa Niu Kosema Tumanuvao e momoli le faafetai tele i le paia ma le mamalu o le atunuu na aofaga potopoto atu e lagolago lo latou faamoemoe lea ua ausia ai lenei tupe tele $78.700.00.
O lea foi aso na faagasolo ai i nisi pitonuu o Sini nei faamoemoe o nisi afioaga e lua mai Upolu i Samoa. Na mae‘a le aso i le taliu o le valaaulia ua laulelei i le tali faaaloalo a le mafutaga e ala i taumafataga lelei tapena ma faafiafiaga matagofie.
