I le gugulu pea o Samoa i Sini Ausetalia i le leva e lei toe filifilia se tama Samoa mai Niu Sa Uelese i le Manu Samoa, na fesiligia ai se sui iloga muamua o le Manu Samoa ia Gisa Vili Alaalatoa i sona taofi.
“O le tulaga muamua lava e ao ona ausia e se tama taalo i Sini nei e fia tauva mo le ‘au a le atunuu, e tatau ona taalo muamua i le tauvaga o le premier, faasolosolo atu ai i ‘au faaitumlo e pei o Waratahs, Reds, Rebels faapea le Western Force.”
E pei ona silafia o Gisa Vili Alaalatoa na iloga lona tulai mai i lakapi i Sini nei mo Manly ma piki atu ai loa e le Manu Samoa i lana malaga taamilo i Uelese ma Aialani i le 1988 sosoo ai ma lana tamilosaga muamua i Europa i le 1989 ae taualuga i le Ipu o le lalolagi i le 1991.
I se faatalanoaga a Gisa Vili Alaalatoa ma le Samoa Times na ia fesiligia ai le agaga finau o tama talavou Samoa auā aufili faaitumalo i Sini nei ma le aufili a le atunuu. Na ia saunoa o le eseese i le taimi nei ma vaitaimi o taaalo e mafua mai i le agaga finau.Ua vaaia le faavaivai gofie o nisi tamaiti o le atunuu pe a faatusa i o latou taimi auā le fia tautua atunuu.
“O le auai mai o ‘au e pei o le Manu Samoa ma le Samoa-A i laufanua o Ausetalia ua avea ma pine faamau o le maualuga o le filiina o ‘au taitasi.” Afai lava e lē selau pasene le koleni siisii a le tama taalo faapea le mānava (fitness), o le leai foi lea o sona avanoa e tautua ai mo Samoa.”
“O le itu lenei ou te faafetaia ai le agaga finau o faiaoga ma tama taaalo lava ia mai Samoa auā o lo faatāuaina le filifilia e fai ma avefu‘a a Samoa.”
O le 1988 i le taimi muamua na malaga taamilo ai le Manu i Uelese ma Aialani na moomia ai lava ni fitafita lototetele e asa le vaofilifili na feagai ma le Manu Samoa. E lei faigofie ae peitai e manatua pea sui tuai i lea vaitaimi e pei o Lolani Koko, Malaki Iupeli, Taufusi Salesa, Anetelea Aiolupo, Stan Toomalatai, Tupo Faamasino, Filipo Saena, Keneti Sio, Peter Fatialaofa ma le toatele.
“E lei faigofie ia vaitaimi ona e pei o le Olopeleki na faamuamua e le toatele o nisi na taaalo i Niu Sila, ae peitai o le loto Samoa lava na mafuli ai le toatele e pei o Stephen Bachop, Frank Bunce, Mark Birtwhistle ma Mataafa Keenan na iloga ai le taumafai a le Manu Samoa i na tausaga.”
Saunoa Gisa afai e toe maua mai le agaga finau faapenei i tamafanau a Sini, e mautinoa le toatele o ni alo e tagai i ai i le lumanai. E lē faigofie foi le filifiliga auā ua lelei tele tama mai Samoa. O lenei lava tautua ua avea ai pea Gisa ma fofoga o Sini i aulakapi e malaga mai Samoa. Ua sauni atu foi o ia e talia le faailoga o le Tagatanuu Faamoemoeina a Sini i ni tufaga faailoga o le Tutoatasi.
