O ē e faatalitali i le taimi sa‘o o le Alii, e faafouina lo latou malosi, e lē lagona se vaivai, e saogalemu o latou soifua, poo ā lava pesiga o le olaga.
O le susuga i le faafeagaiga ia Pevise ma le faletua ia Kirita Lui, na a‘otauina i le aoga faafaifeau a le C.O.C i le Atu Solomona.
E ui ina sa valaauina o la soifua ma galulue ai i nisi o Ekalesia Paia i Niu Sila ma Melepone, ae ave lava o la agaga i le Ekalesia na faaauupegaina ma faafaileleina o la soifua faafaifeau, o le ala lea na o la amata fesootai ai ma le pulega a le COC i Vitoria i le amataga o le tausaga ua mavae atu 2011, ma faataoto mai ai le fuafuaga mo le amataga o le 2012 e tatalaina ai se galuega mo le mamalu o Samoa i Melepone.
O le Aso Sa na tuanai atu aso 11 o Mati, na tatala aloaia ai le moemitiga a le faafeagaiga ma lona faletua, ma faapaiaina ai le lotu Samoa muamua a le Christian Outreach Center i Vitoria.
O le taitai o le Ekalesia i Vitoria susuga a Pastor Craig Anderson na faapaiaina le galuega fou, o ia foi na fofogaina le upu folafola mo le valaaulia ma Samoa na lagolagoina le faamoemoe.
Na saunia e le Ekalesia le taumafataga mo le aufaigaluega ma le valaaulia.
O le tuatusi, Burley Griffin Community Center, Keilor East, taimi amata o sauniga i Aso Sa, 9:30, ma le telefoni o le ofisa 03 9747 9009, pe a fia asiasi atu.
Tatalo le auaunaga a le Apu FM Radio ma le Samoa Times, ina ia tele ni agaga e liuliu mo le Atua ma lona finagalo, i la outou tautua faa-Ekalesia.
