O le a iai se isi fautasi faaopoopo i le Segavao II lea ua tele tausaga o tausinio i faagatama i le tai a le atunuu. O le lua o ia sa o le a tausinio o le a mautinoa ai foi le maualuga o le faaopoopoga o le malosi o lenei tausinioga auā le faamanatuina o le 50 tausaga o le tutoatasi o Samoa.
E lei faamautu uma mai sa o le a tausinio i lenei tausaga i lea aso faamanatu, peitai ua amata ona vaaia i gataifale o Apia le agai o auvaa auā tapenaga o tuuga fautasi o le Fu‘a.
Mo le Segavao II le sa a le Ekalesia Katoliko i Siusega, ae faafoeina e tama aoga o le Aoga o Matata Eseeese a le Katoliko, le Don Bosco, o se tausaga tāua tele lenei o le toe foi mai ina ua mae‘a faaletonu o le tausaga na tea nei.
O le mafuaaga tonu lea ua toe suia ai foi le mafaufau o le uluai kapeteni o le Segavao ia Vaimasenuu Zita Martel ina ia toe foi e faatautai mai le tasi o sa a le laumua.
Na ta‘ua e le tamaitaisa pule, Sister Monika Vaipuna o lea ua toe sauni Don Bosco mo faagatama i le tai i le Sisigafu‘a.
“Talu ai ona o le limasefulu tausaga ma o le a tulimatai uma foi e tagata lea faamoemoe, o le ala lena o le toe auai atu”.
“O le faaiuga o le vaiaso ua tea na toe a‘e ai se tofa ina ia toe faaulu le Segavao mo lenei foi tausaga, ma o le a lua foi ni fautasi o le a alo e fanau o le laumua nei,” o lana saunoaga lea.
“Na fesiligia pea i matou e le Alii Palemia e tusa ai ma le faamoemoe o faagatama i le tai o le Tutoatasi, ma na faafaigata se tali ona sa telē lava le faaletonu o le vaa na iai.
Na ta‘ua e Sister Monika, na iloa lava e le toatele le tulaga faaletonu o le vaa ae na lē faavaivai ai lava le fia auai ma le finau o fanau na faafoeina.
“Na ta‘ua e le Alii Palemia na ia iloaina lava tulaga nei o loo faaletonu ai le vaa, ma na ta‘ua foi o le vaa e lei mae‘a ona fai. O le vaa na fau i totonu o le fale ma o le telē lava o le fale na gata ai lava iinā le fausiaina ma e iai foi le isi vaega sa tatau ona fausia ae e lei faia.”
O inā na iloa ai e le tamaitai pule o le malosi lava ma le lototetele o nai fanau e alo lea na ala ai ona tele ina mua le vaa ma lelei ai ana taumafaiga i tausaga ua mavae.
“Ua toe ioe foi le tamaitai kapeteni ia Vaimasenuu e na te kapeteniina le Segavao II ae o le Segavao III ua ou filifilia nei le susuga ia Lui Mulipola e faafoeina,” o lana faaopoopo lea.
E oo mai i le taimi nei e lei vaaia lava ni foliga o le sa fou, ae na ta‘ua e le tamaitai pule o nei tuutuuga uma ua mae‘a ona talanoaina i le susuga i le Alii Palemia ma le tamaitai kapeteni ma ua malilie ai foi le aiga faiaoga ma le laumua.
O loo galulue nei la nisi o alii faiaoga i le toe faaleleia o vaega o le sa tuai mai ona manu‘aga i le Teuila o le tausaga ua mavae.
O le amataga o le vaiaso na faailoa mai ai foi e le tamaitaisa, e silia ma le to‘a 170 fanau a le aoga ua tuuina o latou igoa mo le lisi o le aukoleni a le auvaa.
“E lē mafai ona o uma i latou nei auā e iai fuataga a le komiti mo i latou e agavaa mo lea foi faamoemoe.
“E matuā lē taliaina se au aitapaa, inupia ma tia‘i aoga i nei mea uma, ma e fuafua foi le numera o le auvaa i le seleni o loo tuuina mai e le kamupani o loo lagolagoina (sponsor) lea itu.
Na ta‘ua e le tamaitaisa, na lē gafatia e le $20,000 a le Digicel le faatupeina o tapenapenaga ma mea uma e faaleleia o le vaa ae lei faia le tuuga. E ui i na tulaga uma e lei faavaivai ai le toatele o fanau e fia auai i faagatama i le tai.
O le amataga foi o le vaiaso na amata ai toleniga a le auvaa i le mae‘a ai o vasega masani faaleaoaoga a alii o lea aoga.
“O toleniga ua mae‘a logoina foi faiaoga e nafa ma lea itu, e lē mafai ona faia ni toleniga i taimi o vasega ma e faatali lava seia tuua le aoga. Afai o le itu lea na ala ai ona sau le isi tamaitiiti i le aoga, e onosai lava lona fia alovaa seia oo i taimi faatulagaina o toleniga.”
Na fesiligia foi Vaimasenuu e tusa ai ma lona toe foi mai i le taaloga, ae na ia ta‘ua ai le tele o se luitau na feagai ma ia talu mai le tauvaga ua mavae.
“E ui na aloaia la‘u faamavaega ae e iai taimi e toe tu mai ai i o ta luma se lui ma e tatau lava ona foia,” o Vaimasenuu lea.
“Sa lei faigofie lo‘u toe foi mai, ae peitai o tulaga lava e oo uma ai tatou e iai taimi e musu ai ae iai foi le taimi e toe fia auai ai. O le mau a Vaimasenuu, o le tauvaga i le tausaga nei o le a lē toe faigofie ma o i foi e iloa ai lava autū o faigamea.
“Atonu o i o le a iloilo uma ai sa poo fea le sa‘o o le tauvaga o le tausaga ua mavae, e ui ina tulaga faaletonu le Segavao,” o lana faaopoopo lea.
O le isi itu na ia ta‘ua o le toatele o fanau o le a aloina le vaa e fou, ma e moomia le lava o toleniga ma aoao i metotia ua masani ai tama na aloina le Segavao talu ona auai i faagatama i le tai.
“O le auga lava lea o Aso Faapitoa a le malo o Samoa o faagatama i le tai, ma ua masani foi le Segavao i tulaga uma, atonu o le taimi lenei e toe foi ai loa e laga le toilalo.”
E ui lava e lenei amata faia ni resitala mo fautasi o le Tutoatasi ae ua faamaonia mai e Don Bosco le lua o a latou sa ma lona toe auai ai i faagatama i le tai.
E lei toe fia talanoa le toatele o alo ma fanau o loo aotauina i le aoga i le faaletonu na iai lo latou sa, ae ua tasi lava le latou taofi o le toe foi e faaiila le taleni ua masani ai tama Poseko.
