E pei lava o loo faia ni taaloga faavaomalo i le Malae a le Malisi i Lotopa i le vaiaso na tea nei a o faatautaia taaloga mo le fili mai ai o se ‘au a le atunuu i le Taamilosaga o le Taitoafitu a le Pulega o taaloga Lakapi faavaomalo le IRB.
Talu le manumalo mai o le ‘au a le atunuu i Amerika o lea ua tele foi finagalo faaalia i le isi laasaga o le taitoafitu i Hong Kong faapea ai Iapani lea e mulimuli mai.
O lea na toe foi mai le ‘au ma amata toleniga peitai e lei tuufaatasia lava ona o le tau sailiili lelei poo ai o le a filifilia mo ia vaega o soosoo o le IRB 7. O lea la ua mae‘a le filiga o le ‘au ae o le vaiaso lenei faato‘ā tuufaatasi ai loa mo le vaiaso atoa.
O se tasi o alii ua iloga lava le lē toe vaaia i le tausinioga lenei o Mikaele Pesamino ma e lei manuia foi ana taumafaiga o le vaiaso na tea nei mo le ‘au tele.
O lea ua filifilia i le vaega o le faaleoleo ma e lē malaga ma le ‘au se‘i vaganā ua manu‘a se tasi ona mafai lea ona malaga i Hong Kong poo Iapani foi.
Sa toatele foi na faaali finagalo ua oo i le taimi e malolo ai Uale Ma‘i ma Lolo Lui, auā ua matutua peitai o lea o loo filifilia lava nei alii i le ‘au tele mo ia taamilosaga e lua o loma nei. O le tasi o faaopoopoga o le Manu Samoa o le alii o Ken Pisi, o le uso laitiiti o Tusi Pisi ma George Pisi, ia sa taaalo mo Samoa i le Manu Samoa 15 mo le Ipu o le Lalolagi. O le alii o Ken e laititi ma e taalo i le kalapu na le North Harbour i Aukilani i Niu Sila.
O se tasi o alii ua tele foi tausaga o tausinio i lenei faagatama ma sa faapea ona avea ma sui o Niu Sila i le ‘au i lalo o le 21 tausaga, ma sa faapea foi ona tausinio mo le taitoa 7 a Niu Sila ae na see ese mai i le faiga filifiliga o le taamilosaga tele o le IRB ona o lona manaoga e taalo mo Samoa. O lea la ua filifilia lenei alii i le mae‘a ai ona totogi lava e ia lona pasese ae malaga mai mo le faiga filifiliga i Samoa nei.
O le Aso Faraile o le vaiaso lenei e tuua ai e alo nei o Samoa le atunuu auā Taamilosaga i Hong Kong faapea ai ma Iapani.
O le Manu Samoa lenei mo le Taitoa 7 i Hong Kong faapea ai Iapani
Forwards/Laina i Luma
• Alafoti Faosiliva
• Afa Aiono
• Faatoina Autagavaia
• Reupena Levasa
Backs/Laina i Tua
• Uale Ma‘i
• Lolo Lui
• Tom Iosefo
• Alatasi Tupou
• Taulagi Afamasaga
• Paul Perez
• Robert Lilomaiava
• Ken Pisi
Non Travel Reserves/Faaleoleo
• Mikaele Pesamino
• Levi Asi Faamatala
• Sani Niue
Management:Pulega a le Au Stephen Betham
Head Coach:Faiaoga
Tausa Faamaoni Lalomilo
Team Manager:Taitai Malaga Akbar Bhamji Physiotherapist :Fomai
