O se finagalo lea o le Minisita Faataitai o Tupe a le Vaega faaupufai o loo agaia le Malo, le afioga Afualo Dr Wood Salele ina ua tapa sona manatu i le faatuputupulaia ai pea o le numera o Faalapotopotoga Tumaoti ua o latou laga le faiaga tele o le Ofisa o Tupe i le faasoaina o totogi o auaunaga ua faatino e nei atina‘e tumaoti mo soo se matagaluega a le Malo.
O se faafitauli lenei ua tele tausaga o vaaia, o le ta‘i vaiaso e oo lava ina ta‘i masina o faatali atina‘e tumaoti ia latou tupe, i le mae‘a ai ona faia o ni auaunaga mo ofisa o le Malo.
O soo se matagaluega lava o le Malo ua faasoa mai a latou tala o le tupe o lea tausaga ma lea tausaga mai i le Matagaluega o Tupe.
E na o faalapotopotoga a le Malo ia e faatamoe o ni pisinisi, o loo sau sa‘o lava totogi o auaunaga latou te faaaogāina mai i o latou ofisa.
O le faafitauli tele la ua tulai mai, o le afaina ai o le tele o pisinisi laiti ona e fai o le faaalu o tupe e faatino ai auaunaga nei e moomia e matagaluega a le Malo ae o le tuai ona maua mai o siaki mai i le Ofisa o Tupe ua afaina ai loa a latou pisinisi i le tupe maua ma ua afaina ai le faagasologa o a latou auaunaga.
“Ua leva tele ona tulai mai lenei faafitauli ae e foliga mai e lē o ano lava le Ofisa o tupe i aafiaga o pisinisi tumaoti ona o le latou faifaiaga,” o se faaaliga lea a le afioga Afualo.
“O le faagasologa o tupe maua ma tupe faaaogā (cashflow) o le fatu lea o se faipisinisi ma a lē maua le seleni e faatino ai e gau le pisinisi”.
O le faatinoga o totogi o auaunaga nei e amata mai lava i le ave o le pili i se matagaluega ona faatali lea i ni nai aso ma toe logologo i ai poo ua ave le pili lea i le Ofisa o Tupe.
A mae‘a lea galuega e faia e le Matagaluega na talosagaina le auaunaga ona faatali loa foi lea i le Ofisa o tupe i tagata e vaaia tupe a matagaluega eseese pe ua faamalieina i le pili ua avatu ae o ā foi isi gaioiga e tatau ona faamaonia ai.
Ae o lea ua ioe le matagaluega e totogi ane loa le tupe.
O le feuiaiga lea e atoa ai lava le lua i le tolu vaiaso pe afai e le faamalieina le Ofisa o tupe i se faamaumauga i totonu o pili nei.
E mae‘a lea ona ave lea i suetusi ma afai e lē malilie foi suetusi i le faatumuga o pili nei ona toe aumai lea i fafo toe ave i Matagaluega mo faasaoga ma toe foi mai ai lava i pisinisi tumaoti.
Mae‘a lea ona vaavaai lea pe ua malilie suetusi. Seiloga lava la ua malilie suetusi ona faato‘ā mafai foi lea ona mamulu mai le siaki.
O se faiga e mae‘a ane ua faaalia e le toatele ua matuā sisii lava lima. Na Fesili ia Tupaimatuna Iulai Lavea le alii ofisa sili o Tupe e tatau lava ona faatali seia mae‘a le ta‘i lua i le tolu vaiaso poo masina foi ona maua lea o se tupe peitai e lei tali mai fesootaiga na faia ma le alii pule.
Ua tele faitioga ua momoli i le Ofisa o Tupe ona o le tuai ona faatautaia o a latou galuega ma ua iai foi nisi ua faapea mai e lagolagoina lava le matafaioi o le Matagaluega i le sailiili ma le suesue ina ia mautinoa e leai foi se avanoa e pelogia ai e le toatele auala e maua ai tupe mai i le Malo.
Ae o le umi ona faatali ua faaalia ai foi e le Faalapotopotoga o Pisinisi a Samoa (Chamber of Commerce) e tatau lava ona toe silasila le Malo i ni auala e mafai ai ona lagolago atu le Malo latou i atina‘e laiti o loo tau atia‘e ona o le afaina ai i le tuai ona maua o le seleni ae ua mae’a ona fai a latou auaunaga.
“O le isi lava itu afai e leai se tupe o iai e fai ai totogi nei, aua le faatigaina fua tagata e ala i le aumai o soo se ituaiga faamatalaga i le mafuaaga o le tuai ona maua o nei tupe.
Fai mai sa‘o ua leai se tupe a le Malo,” o se saunoaga lea a le afioga Afualo.
