O le vaitau fiafia o le seleselega mo alo o le atunuu ina ua tofo i le suamalie o fua o faamanuiaga, mai tausaga vevela na tauivi ai ma le se‘iina o aa malolosi o le asamoina o le poto, lea ua latou taulimaina faailoga tikeri sa tulimatai i le faauuga i le Iunivesite Canterbury, na faataunuuina aso 14 -16 Tesema.
E toatolu sui mai le Saofaiga o Aoaoga i Papagalagala na malaga mai ma faauuina i le faailoga Master of Teaching & Learning: Dawn Rasmussen, Onelau Faamoemoe Hakai Soti & Judy Asuao Pouono, faatasi ai ma Christina Laalaai Tausa i le Master of Int Law & Politics.
E 39 le aofai o i latou na faamanuiaina e ui ina sa tutaia polokalame aoga ona o mafatiaga o le mafui‘e, ae faafoi pea le faafetai i le Atua ua mafai ona faataunuuina le taumafai i le manuia.
Pei ona masani ai tausaga uma i le saunia o se taumafataga faapitoa (Pacific Graduates Dinner), e aloaia ai le taumafai o alo Pasefika lea sa faataunuuina i totonu o le Iunivesite ma faatautaia e le Pacific Development Team, o Efeso Collins (Aukilani) sa avea ma failauga faapitoa o le afiafi.
Na maitauina le toatele o nai mātua na malaga mai Samoa aemaise le faatumulia i aiga ma uo e masani ai aso fiafia faapenei. Faamalo le finau, malo le faatoatoa, Faamalo le faaea aiga.
