Ua faamuta nei le faafoeina o le taaloga o le Lotto Samoa, o se pisinisi sa umia e se tasi o aiga o le atunuu lauiloa i pisinisi, ina ua mae‘a le aogā o le laisene sa tuuina i ai e le Malo. O le Aso Toonai na tea nei le se‘i mulimuli o le Lotto Samoa lea sa faalauiloa mai ai e se tasi o le kamupani le susuga Konrad Keil, le mae‘a o le taaloga e lē toe faia ona ua mae‘a le aogā o le laisene. E pei ona silafia o le taaloga lenei ina ua amata faagaioia i Samoa, sa umia sea e le aiga o William Keil, faatasi ai ma nisi o le aufaipisinisi ma tagata taitoatasi.
O le tausaga e 2009 na faailoa ai e le faauluuluga o le pulega o taaloga o petipetiga a le Malo le TAB le Totoallisator Agency Board, le faia o le faaiuga e faamuta le toe tuuina atu o se laisene e faafoe ai e se vaega o ni tagata poo se tagata ia ituaiga o taaloga ona, e toaitiiti se vaega o tagata e manuia ai.
O le mau foi a le pulega o le TAB, e talu lava ona amata le Lotto Samoa ua tele tausaga o faafoe e se aiga, e lei lava seleni sa tuuina atu i le komiti o petipetiga e fesoasoani ai i le atina‘e o taaloga eseese i le atunuu.
Ua lua nei tausaga talu ona faafoe e le Malo le taaloga Lotto fou le National Lotto, ma le faamoemoe e sasaa atu tupe maua i le atina‘e o taaloga i Samoa.
Faaalia e le pulega o le taaloga o le Lotto Samoa e tusa ma le 44 miliona se vaegatupe ua faaalu i faailoga talu ona faagaioia le taaloga i Samoa.
E 15 afe le faailogatupe o le jackpot o le Lotto Samoa na faamuta ai lana auaunaga tau taaloga faitupe, ma e lē o iloa pe na manumalo ai se tasi, auā a lē maua o se pasene o lea faailogatupe e tuuina atu i le komiti o petipetiga a le Malo.
E lē o iloa pe toafia nisi na manumalo i faailoga eseese o le Lotto Samoa e pei o le aumanumalo i le ta‘i 4 numera sasa‘o ae e lei oo atu e ave a latou faailoga tupe.
