Manuia le tausaga fou. Alo maia i le faaauauina o a tatou Luitau.
E masani le leoleo o le falepuipui i le leoleoina o pagota. Poo le ā le taimi o ona tiute, ua mautinoa galuega faatino ma tulaga e ausia mo aso taitasi. Ae o le aso lea, sa faafuasei ona lulu le mafuie ma manunu ai faavae o le falepuipu ma matalatala ai puipui ma faitotoa o le fale.
E lei manatu e iai se mea faapea o le a tupu. Sa faafuasei ona tupu lea mea, ma atuatuvale ai lona manatu. E tasi mea ua oso i lona loto, ua sosola pagota. Ua manatu i le tulafono, o lona ola e totogi ai le ola o se pagota e sola. Ua lē mautonu, pau le mea ua manatu i ai, ia pule loa i lona ola.
E iai mea e tutupu faafuasei ia i tatou, mea e lei mafaufauina. O mea e osofaia faafuasei lo latou faatuatua, ma tupu ai lo tatou polepolevale. Ua tele tagata Samoa ua maliliu i le pule i le ola, ua manatu e lē toe iai se faamoemoe, pau le mea e fai o le oti.
O le manatu fefe i mātua ma aiga, poo le loto ua saisaitia e mafatiaga ona o mea e tutupu i le olaga nei. Ua faiaina manatu lelei ona ua pulea e le maasiasi. Atonu foi o oe lea e te faitauina lenei Luitau, o loo e iai i ni lagona faapea. Poo se mea ua tupu i sou alo, poo lou toalua. Pe ua tuli oe mai le galuega. Poo maua i se gasegase ua autausagā e lei maua lava se mapusaga.
Poo le ā lava se mea o fai ma avega, e iai le avanoa o le tiapolo e faaofiofi atu ai ni manatu toilalo ma lepeti lou faatuatuaga faakerisiano.
E iai se tamā matua o le matou ekalesia sa ave i le maota gasegase. Sa fai lona faata ma maua ai ni faaletonu tuga o lona fatu. Sa atuatuvale le tina ma tagi, ae sa faalototele e le tamā le tina ma le fanau. Sa faasaga i le tatalo ma le anapogi. Sa toe faia le isi faata i ni nai vaiaso mulimuli ane ma toe iloa ai ua lelei atoa lona fatu.
Atonu e iai nisi e lei foi i se lelei, o nisi sa faatuatua, o nisi sa atuatuvale. Manatua, e lē mafai e lou popole ona fesoasoani ia te oe.
E lulu le mafuie, o loo moe le leoleo o le falepuipui. O le galuega lea e lē tatau ona moe ai se tagata. Ae ta‘u mai ai le tulaga ua iai le leoleo, ua vaivai. Ua lē lavā.
O le tasi lea natura o le soifuaga faaletagata, e iai le taimi e maua ai e le vaivai. Poo le ā sou fia faaleagaga, poo le ā sou faauuina, e iai le taimi e te vaivai ai. E oo ai manatu fa‘atu ma le fiu, ma faigofie ai i le tiapolo ona ofi atu sana musumusu, pule loa i lou ola. Pe faapea, aua e te toe alu i le lotu, o lena e faaaogā e isi lou malosi.
O le faataoto i taupou popoto ma taupou valelea, na ave uma lamepa ma suauu. Faatali faatali, ua tuai mai le Faatoafaiavā, ma iu ina momoe le toalima vālea. Alu alu le faatalitali, e lei sau lava le faatoafaiava, ma momoe atu ai ma taupou popoto.
E ta‘u mai ia tatou, pe te potope te valea, maualuga pe lē taualoa, tofi pe leai se tofi, e te vaivai lava i se taimi. Ae manaia le oo mai o ni faafitauli o loo lava se suauu, o loo iai nai faapolopolo mo aso vale. A iai ni mafuie tutupu faafuasei ma ni matagi oso faavalemalosi, ae o loo iai le filemu o le Atua i totonu o lou loto, poo mausali foi le aiga i se faavae mautu.
Ua tele tagata o si o tatou atunuu ua malaia ona o le pule i le ola. O mea e tutupu i le olaga ua maua ai le pagatia. O le manatu o le leoleo o le falepuipui, ia faauma loa lona ola i le pelu, ae alaga atu Paulo, aua ne‘i faia e oe se mea e leaga ai oe.
O le alaga o le alofa. O lapataiga mai le finagalo alofa o le Atua ina ia saogalemu oe. O ā ni faaletonu o le 2011, aua ne‘i toe faia i le 2012. O ā foi ni toatuga, po ua iai se manatu e te sola ese mai lou toalua, pe faatino se agasala, o le valaau alofa mo oe; aua!
Ina ua mautinoa e le pule o le falepuipui le saogalemu o pagota, ua ia fesili poo le ā se mea e tatau ona ia fai e maua ai le ola. Ua suia le fia oti i le fia ola. Ua suia le leai o se faamoemoe i se faamoemoe ola. Ua totogo ane moemoe fou o le soifua fia saili i le Atua.
O mea e tutupu e taitaiina ai le tagata poto i le iuga o lona iloa ma lona malosi, ae amata ai ona tuufesili, poo ai se isi e maua ai le fesoasoani? O ai se isi e malamalama i lo‘u mafatiaga? O ai se isi e aapa mai na te aveese le loto faanoanoa? O le tali, e na o le Atua lava.
O la le faisalamo, “afai e le atiae e Ieova le fale, e galulue fua e atiae…” O lona uiga, a lē iai le Atua i le savaliga ma taupulega o le tausaga lenei, e iuvale mea uma lava e te manatu e fai. O le fesili a Mose i le Atua, o tatou o ea ma oe i le malaga?
Avea lenei tausaga fou e fai ma tausaga manuia mo oe. O le tausaga e siitia ai lau silasila mamao, ma fai filifiliga manuia mo oe atoa ma lou aiga, aemaise ekalesia o galulue ai. Soifua.
