Ua tele atunuu ua fai paaga ma Samoa ma o se mafutaga e mafanafana ma vavalalata pe a fua i le tele o fesoasoani o loo solo mai ai mo le faaleleia o le atinae o le tamaoaiga o lo tatou atunuu i soo se vaega.
Faapei la o le atunuu o Ausetalia ua lē masino lava lona fia fesoasoani pea ia Samoa lea ua toe faaopoopo ana fesoasoani ma ua siitia foi mo le isi tausaga faaletupe o loo sosoo ai nei 2014 i le 2015.
E $75 miliona tala Samoa o le a faasafua mai e lea Malo mo le faaleleia o atinae tau i le siitia o pisinisi tuma‘oti mo le faaleleia o le tamaoaiga aemaise o le tulaga i fefaataua‘iga. O le tamaitai Hai Komesina o Ausetalia i Samoa o Sue Langford ua ia faailoa lea fesoasoani a lona Malo ma lana saunoaga e lē muta ai le alofa tulai o Ausetalia mo Samoa.
E 1.3 miliona tala Ausetalia poo le 2.6 miliona tala Samoa ua faaopoopoina ai fesoasoani a le Malo mo lo tatou atunuu mo le tausaga faaletupe fou e amatalia i le masina o Iulai o le tausaga nei 2014, ae faiuina i le masina o Iuni o le tausaga fou 2015.
O le fesoasoani a lea Malo na aloaia ai se sainigalima a le alii faipule o le senate a lea Malo le alii o Senatoa Brett Mason ma le afioga i le Palemia susuga Tuilaepa Lupesoliai Sailele Malielegaoi i nai vaiaso e lei mamao atu.
O le toe fausia o nisi alatetele e pei o le alasima i Maluafou na faaleagaina i le afā o Eveni le tasi o galuega o le a faatupe e Ausetalia, faapea nisi o auala galue ma alatetele e fesootai ma atinae tau faatoaga. O aoaoga le isi atinae o le a sasaa i ai le fesoasoani a lea Malo e pei foi ona agalelei mai i le totogiina o pili o fanau i aoga tulagalua lea o loo vaavaalua ai ma le Malo o Niu Sila.
O le itu i le soifua maloloina o loo aofia i le fesoasoani ona o se isi lea o vaega tāua i le tamaoaiga o lo tatou atunuu. Ua ofo mai ai foi ma avanoa sikolasipi e 43 mo le itu i aoaoga e amatalia i le tausaga fou, ma o se isi lea o matati‘a ua ausia i fesoasoani mo Samoa a lea Malo malosi lona tamaoaiga i le itu tau tupe.
Faaalia e le tamaitai Hai Komesina o se itu tāua lea i le fesoasoani mo le tausaga faaletupe o loo lumanai, ona e pei lava o le soifua maloloina ma aoaoga e sili ona ave i ai le faatāua auā o le tasi lea ivitu o taumafaiga i le faaleleia o le tamaoaiga o Samoa.
O le taufai tutusa o avanoa o alii ma tamaitai le isi o galuega tele i le fesoasoani ma o le a nafa lea ma le Matagaluega o Tina ma Tamaitai atinae o nuu ma afioaga ma aga fesootai.
