O faipulea ia o loo iai ma minisita e toafā o le Kapeneta, e aofia ai le Sui palemia faapea le Sui fofoga fetalai o le Palemene
Atonu o lea ua toe maua se to‘a i le gasegase i le lotoifale o le vaega faaupufai o le HRPP ina ua faamavae le afioga Faumuina Tiatia Liuga sa avea ma minisita o tupe.
Peitai o le tuanai o masina sa fesoua‘ina ai le vaega faaupufai, o lea ua faatoa iloa nei e to‘a 21 faipule o le HRPP na tusi i le taitai, le afioga i le Palemia susuga Tuilaepa L Sailele Malielegaoi ma finauina ai le tatau ona aveese Faumuina ma le Kapeneta ona o ona aafiaga i le lipoti a le Suetusi sili a le Malo.
O le lomiga a le nusipepa o le Sunday Samoan o le amataga o le vaiaso nei na faasalalau ai lea tusi na faaliliu mai i le kopi o le tusi na tusia i le gagana Samoa, ma o loo matilatila ai ma saini a faipule e to‘a luasefulutasi. O faipulea ia o loo iai ma minisita e toafā o le Kapeneta, e aofia ai le Sui palemia faapea le Sui fofoga fetalai o le Palemene.
O loo faaalia i le tusi e faapea o le tali a le Palemia i le tusi muamua lea na faia ai le fono a le faafaletui ma faatino ai le palota e to‘a 16 na lagolagoina le faaauau pea o Faumuina i le tofi minisita o tupe, ae to‘a sefuluono foi na tetee.
Peitai o le tasi o minisita o le Kapeneta le afioga Tuisugaletaua Sofara Aveau e lei auai ona sa malaga mo fonotaga i fafo faapea le faipule o Alataua i Sisifo le tofa Lafaitele Patrick Leiataualesa sa toesea, e maua ai le numela e 34 o faipule o le faafaletui, lea e faapea e maua ai le numela manumalo o le au tetee.
O le faaiuga lea a le fafaletui e lē o taliaina e faipule e 21 na toe ave le latou tusi i le Palemia ona o lo latou lē taliaina o le faaiuga na taunuu i ai le filifiliga a le vaega faaupufai faasaga i le minisita o tupe sa iai lea ua faamavae.
O le mama i tua o le tusi lona lua ma faasalalau ai e lea nusipepa, o se ata manino lea o le taatiaga o le mataupu sa fetosoa‘i ai lipoti a le aufaasalalau ona o le lē maua tonu o se finagalo o le taitai o le HRPP i le tulaga tonu sa iai le fesoua‘ina o le vaega faaupufai.
E iai le talitonuga o lea ua toe masuiga mālie le vaeluaina o finagalo o le faafaletui i le mataupu i le minisita o tupe ina ua tuua e Faumuina le tofiga i le Kapeneta. Peitai o loo iai pea nisi mataupu e fesootai ma le mataupu lava lea o loo lagomia ai lagona o nisi o faipule, aemaise lava ia i latou o loo i totonu o le Komiti o tupe a le Palemene ma le Komiti o ofisa o le Palemene, ona o loo latou tālia se tali a le Malo i le 90 aso agai i fautuaga i le taunuuga o suesuega a le Suetusi Sili e pei ona finauina e nisi le tatau ona faia ni moliaga faasolitulafono ia i latou o loo tuua‘ia i le lipoti a le Suetusi Sili e aofia ai lē sa avea ma minisita o tupe.
