Gāgā Laulu Viane ma si ona atalii o Viane Gāgā Laulu Viane
O le aso 13 o Tesema i le tausaga e 2011 na tuua ai e le tamā ia Gāgā Laulu Viane le mafutaga ma le tina ia Susitina faapea le fanau ona o le maliu ma le oti, ae o le aso 12 o Me i le tausaga e 2013 na momotu faafuasei ai le mafutaga a le aiga ma le alii o Viane Gāgā Laulu Viane ona o se faalavelave faafuasei.
Ae o le Aso Toonai la na tea nei, aso 17 o Me na tatala ai loa le maa faamanatu o le tamā ma lona atalii ia Viane i le fanuatanu i Magele. Na amata le faamoemoe i le Misasa Paia na taitaia e le Afioga Patele Felise i le malumalu o le Ekalesia Katoliko i Magele ona sosoo ai lea ma le agai atu i le fanuatanu e tatala le maa na saunia e le tina ma le fanau.
Na toe amata i upu faamalosi mai le Afioga a le Atua le tatalaina o le maa, ma sosoo ai loa ma le ootiina o le lipine e se tasi o alo o le tama, le alii o Mataio ma o ia foi na tolaulauina upu o loo tusia i luga o le maa e faatatau i le tamā ma lona atalii.
O loimata o le alofa ma le misia o le mafutaga na vaaia i lea aso i le tina ma le fanau ina ua latou toe mafuta atu i le tuugamau. O aiga na malaga mai i Samoa, o i latou mai i Ausetalia faapea Ueligitone sa auai uma i lea faamoemoe tāua.
Sa mafai ona auai atu i ai nisi o faiaoga o le kolisi o De La Salle ma uo a le alii o Viane i totonu o le aoga sa latou mafuta faatasi. Na mae‘a le sauniga ona faalelea lea o paluni i luga e faailo ai lea foi sauniga tāua e pei o faamoemoe faapenei.
Na taualuga le polokalame o le aso i se taumafataga tele i le maota o le matagaluega o le Ekalesia Faapotopotoga Kerisiano Samoa i Magele i Sisifo. O le tofa ia Lilo Tino sa fai ma sui o aiga na lua e faafeiloai le mamalu o le auvalaaulia faapea le Ekalesia Katoliko sa auai.
Na maualuga ma matagofie tapenapenaga a le tina ma le fanau ina ua faafiafia le ausiva o le Tatau i ana faafiafiaga e pei ona lauiloa ai i le Pasefika, aemaise o le tautua mata ‘ata‘ata a le fale‘aiga o le Talimanao na latou saunia le taumafataga. Ae na molimau se tasi o le fanau le susuga ia Mataio i uiga o le latou tamā, e faimea mālie, e lelei lana siva ma e ta foi lana tatau, o le mafuaaga lea ua latou valaaulia ai lenei ausiva e faafiafia e manatua ai pea uiga lelei o le tamā.
O le polokalame mulimuli o le aso na tu tootoo ai le tofa ia Tui Tino e momoli le faafetai i le paia o Samoa potopoto sa auai faapea foi faaaloaloga e pei ona iai le aganuu a Samoa i aso faapenei.
