Ua alu le uta muamua o le sua o le nonu mai le kamupani o le Pure Pacifica Samoa i Vaitele mo maketi i Saina.
O le vaiaso na tea nei na ave ai lea uta e tusa ma le 144 afe lita, ae o loo taulai tapenaga a le kamupani i le oo atu i le tausaga e 2013 ua maua le 5 miliona lita e ave i maketi i lea atunuu tele o le lalolagi.
O le Aso Lua ua tea nei na ave ai le uluai uta, “O se uta tele lea ua ave e le kamupani i se container 6×20 futu lona umi”, o se faaaliga lea mai le Pure Pacifica i Vaitele.
O Me na amata aoina mai ai le nonu e le kamupani mai Upolu ma Savaii ona ave lea faapala mo le tolu masina, lea ua maua ai le uta muamua ua ave.
O le masina o Setema sa faailoa muamua mai e le kamupani e ave ai le uta muamua, peitai ua tuai laitiiti e pei ona faato‘ā ave i le tau amataga o le masina nei o Oketopa.
Faaalia e le alii pule o le Pure Pacifica o Masuisui Junior Pereira, o loo galulue faatasi le kamupani ma le Matagaluega o Faatoaga ma Faigafaiva i le faailoa atu lea i le atunuu o loo galueaina le nonu, aua le saogalemu e taulimaina ai le nonu pe a uma ona tau ina ia mautinoa le lelei atoatoa a o lei oo atu i le kamupani mo le faapalaina.
O le isi itu tāua ua faaalia e Masuisui, e na o le nonu ua samasama lelei ma matua e talia, ae o nonu ua amata ona vaivai ma moto e lē taliaina.
O se uta pito telē lea o le sua o le nonu mai Samoa ua aveina i fafo e pei ona faaalia e le kamupani, talu ona osi feagaiga le kamupani ma le kamupani o le New Zealand Natural Dairy i totonu o Saina lea e tolu tausaga le umi o le faiga paaga.
O Tesema o le tausaga nei o loo fuafua e ave ai le 634 lita o le sua o le nonu, ae o le luitau sili ona maualuga o le oo atu i le tausaga fou 2012 ua tatau ona maua le 3 miliona lita, ma le 5 miliona lita pe a oo atu i le tausaga e 2013.
E $9 tala o loo faatau mai ai e le kamupani o le Pure Pacifica le nonu mai le atunuu mo le pakete e 14 kilokalama le mamafa.
O se tau ua sili ona maualuga lea ua ofo e se kamupani i Samoa e fua i le tau o loo faatau mai ai e isi pisinisi o loo gaosia foi le sua o le nonu ma faatau. O loli a le kamupani o loo feoai i vaega uma o le atunuu mo le faatauina mai o le nonu i aso taitasi, ae o loo tatala foi le faitotoa i le atunuu e malaga atu ai lava ma a latou uta nonu i le fale o le kamupani i Vaitele-tai.
O le tasi lea o laau tau faatoaga ua lolofi le toatele i Samoa e atina‘e ona o le vave maua ai o seleni.
O le laau foi o le nonu e lē tele ni galuega i le vaaia ma faafailele auā o se laau e ola solo i le laufanua ma tafa maota ma laoa.
