Ua matou sauni i palota laiti”…Tautua Samoa

Ua naunau sui faipule o le Tautua Samoa Party sei avatu ia le faaiuga a le Fofoga Fetalai, pe moni ua afaina aiaiga o le tulafono o faiga palota ma tulafono tumau a le Palemene i le faatuina ma le faalauiloaina o le latou pati, lea e mafai ai ona soloia ma faaleaoga lo latou filifilia o ni sui o Itumalo faafaipule i le Palemene, ae sei o loa e faatino faiga palota laiti e pei ona valoia. O se feiloaiga a tusitala ma sui masani o le Tautua Samoa na faaalia ai e le tasi o faipule o Safata le afioga Palusalue Faapo II, e le fefefe i se faaiuga e aumai e le Fofoga Fetalai, le tofa Tolofuaivalelei Falemoe Leiataua.
“Ou te leiloa pe iai ni tagata sili ona totoa i Samoa e pei o sui faipule o lenei itu”… o le finagalo lea o Lealailepule Rimoni Aiafi, o le taitaifono o le vaega faaupufai na folasia i luma o tusitala. O le fono faaauau a le palemene i le masina amata o lenei tausaga 2009 na folasia ai e Lealailepule i le palemene le iai o le pati faaupufai, ma faapea ona faatonuina ai e le Fofoga Fetalai e tuuina atu e sui uma o le pati se faamaoniga o latou o sui o le Tautua Samoa i totonu o le 21 aso.
I se feiloaiga a le sui o le nusipepa ma le fofoga pule o le Fono Aoao Faitulafono na ia faamaonia mai ai le maea tuuina atu o faamaoniga a sui o lea pati, sei vagana se tasi o sui e toatasi le tofa Taua Faraimo, o le faipule o Palauli i Sisifo ua ia faailoa atu e le o ia o se sui o le Tautua Samoa. “Na pau lena o le sui e ese ai lona finagalo ae o isi sui uma ua latou faailoa mai o latou o sui o le vaega faaupufai fou,” o le saunoaga lea a le Fofoga Fetalai.
O loo faailoa atu foi e ia sui e ese ai le faipule o Palauli i Sisifo, o loo avea pea i latou ma faipule tutu taitoatasi, ae o sui o le Tautua Samoa i fafo mai o le Palemene ona o tapenaga mo le isi palota tele a le atunuu o loo tulimatai e faia i le tausaga e 2011. E tasi se faipule o le faafaletui o loo pei e faasala ese le agaga o lana tusi e ui e aiga faatasi uma. Saunoa le Fofoga Fetalai ua tusi atu ia te ia le faipule e faapea o ia foi o le sui o le Tautua Samoa mo le palota o le 2011 e tapena ai le faatoilaloina o le Fofoga Fetalai ma le Palemia. “Ou te le fia tauina atu le suafa o le sui lea”, na saunoa mai ai le Fofoga Fetalai.
E le o mafai ona aumai se finagalo o Tolofuaivalelei Falemoe i lana faaiuga o le a fofogaina i luma o le Palemene i le masina o Me pe a toe tauaofia le fono aoao faitulafono, ona sa ia faailoa mai o loo ave sana tusi i le palemene a Niu Sila e saili i ai pe iai ni faipule na faasalaina ona o le le usitaia o ni vaega o a latou tulafono tumau e agai tonu i le faavaeina o ni pati fou, ae ua maea se palota e ese mai i pati faaupufai ua maea ona lesitala. Ua faaalia e le tasi o sui faipule o lea pati le afioga Palusalue Faapo II, na ia feiloai lava i le Fofoga Fetalai ina ua maea ona ave a latou tusi e tusa o lana faatonuga ma faailoa i ai e fia maua vave sana faaiuga ona e tele nisi o a latou polokalame faataatitia. “Na ou fai i ai, afai o lana faaiuga o le toe foi e fai palota laiti, ua matou sauni foi i ai,”… na saunoa ai le tasi o sui faipule o Safata.