Matagofie le faamanatuina i Otara!

E maea galuega o le tausaga 2008, ae ua faataatia foi ma fuafuaga mo le faamanatuina o le aso taua lea ua taua o le “Faamanatuina ma le Faatauaina o le Ausia o Matatia poo Laasaga Faale-A‘oa‘oga i totonu o Otara” poo le (Literacy Day/Celebrating Success in Otara)
O le Aso Toonai la na sei mavae atu nei, na matua faatumulia ai le lotoa a le aoga a Tangaroa College i le aai o Otara i le toatele o tamaiti na mafai ona latou auai atu i le faamanatuina o lenei aso faapitoa mo fanau ma aiga.
O le tausaga na tea nei sa faatumulia ai le lotoa a le aoga tulagalua a St Johns i Otara lava mo le faamoemoe lava lea, peitai e iai le talitonuga na sili atu foi ona toatele tamaiti ma o latou aiga na auai mai i lenei tausaga mo le faatauaina o lenei faamoemoe nai lo le 2008. Ma o se mitamitaga tele lea i le komiti faafoe aemaise lava o le lagona fiafia na faaalia e le pulenuu le susuga ia Len Brown, ona o le maofa o lana vaai i le lagolago malosi a tagata Pasefika aemaise le lautele i le faatauaina ma le faamanautina o lenei aso mo ausiaga a fanau aoga i totonu o le aai o Otara.
Ia e tele ma anoanoai galuega faatino (activities) na folasia e aoga tulagalua taitasi sa auai i lea faamoemoe, aemaise lava le maoae o galuega faatino eseese sa folasia foi e aoga laiti poo aoga amata i totonu lava o le aai o Otara, sa faailoa atu ai le tele o avanoa taua na maua e tamaiti uma na auai atu e latou te faatinoina ai galuega ma faamautuina ai le taua o le aoga o galuega faatino, galuega tusitusi ma le faitautusi foi. O se aso na vaaia ai le fiafia o le fanau e suesue, sailiili, tagotago, sogisogi ma faatino galuega sa mafai ona latou maua e faalautele atili ai le faatauaina o aoaoga tusitusi ma le faitautusi: (literacy and numeracy).
Ia e aga malie lava foi le faalogo ma le vaai foi i nai matua ma le faatagaina o nai o latou alo e faatino galuega sa faaavanoaina mo le fanau. O nisi matua na le mafai ona taofiofi lo latou sagisagi e fesoasoani i le faatinoga o galuega a fanau a o nisi foi sa lagona ai lava le leo foi lea, “Aua, soia e palapala ma piipii na mea e te tago i ai”. Ia o le a faapefea la ona iloa e le tamaititi o le galuega faatino lea e palapala ma piipii pe afai e le tuua i ai se avanoa na te faatinoina ai ma fai ai lava lana ia faaiuga e tusa ma ana suesue ma ana sailiiliga. Ui i lea, na matua faaalia le agaga fiafia ma le loto faafetai o le komiti a Otara aemaise le alii pulenuu ona o se aso matagofie, saogalemu ma le fiafia le faamanatuina o le Literacy Day i Otara.
Ia e iai le lagona o se polokalame, e faaauau pea lenei polokalame i tausaga taitasi ma le talitonuga e tele foi nisi Aoga Tulagalua ma nisi Aoga Amata o le a auai i tausaga o lumanai aua lava le lagolagoina ma le faamanautina o le ausia o mea lelei i totonu o Otara i ona tulaga tau aoaoga.