Gaugau EFKS Foailalo i le tamaitai taufaavalea

Ua taofia e leoleo se tamaitai ma molia i le taufaavalea, ona o sana gaioiga ua gaugau ai le Ekalesia Faapotopotoga Kerisiano poo le EFKS i Foailalo i Savaii, lea ua alu ai le $11,000 a le mafutaga a tina o le aulotu. O lenei gaioiga solitulafono na afua mai ina ua feiloai lea tamaitai o lona igoa o Eseta mai le pitonuu o Magiagi ma le faafeagaiga o le ekalesia, ma folafola i ai o ia e galue i le vaega o fesoasoani a le Iuni a Malo o Europa, mo le faia o fesoasoani mo mafutaga a tina i nuu ma ekalesia, e ala i le tuuina atu o laau suisui.
O taimi uma na faia ai feiloaiga a lea tamaitai ma le mafutaga a tina faapea le faafeagaiga ma lona faletua, sa tapa ai ni seleni o le totogi o nisi o auaunaga lea na migia uma ai le $11,000 e faapea, o tupe sa faapolopolo mo tapenaga o le faamati. O le feiloaiga lava lea na tapena ai foi ma le malaga a le aulotu e alu i Ausetalia, o se polokalame na fafau uma e lea tamaitai ma faaaoga ai seleni a le aulotu. Peitai e o mai le aumalaga i Apia o le a sauni, ae tali atu e malilie e iai se mea se tasi o loo faatali, ma ua toe tuu i le isi vaiaso.
O le mafuaaga lea na masalomia ai e le faifeau le gaioiga a le tamaitai o Eseta ma logoina ai loa leoleo mo se suesuega. O loo faatali nei le isi valaauga o moliaga o lea tamaitai, ae ua faaalia e iai ma se isi tina faamatua tagata sa la toalua i taimi uma e feiloai ai ma le aulotu, lea o loo sailia nei e leoleo poo fea se tulimanu o le atunuu o faapupuu ma lafi lilo ai. Na faaalia e se tasi o tina o le aulotu i Foailalo, e matautia faiga a le tamaitai o Eseta, ona o tala na ia folafola atu ma le faiga atoa o le polokalame, e leai ma se isi na iloa a mea o se taufaavalea.
O taimi foi e oo atu ai, e tali lelei e le mafutaga ma le aulotu, e pei o le latou feiloaiga mulimuli na alaala uma i ai le mafutaga a tina, ma tapena uma totoga masani e pei o lana sua, o se puaa tele ma isi sauniuniga uma. Peitai na matua faateia uma le mafutaga aemaise lava o le faafeagaiga ma lona faletua i le iloa ane mulimuli, e leaga le gaioiga na faia e le tamaitai o Eseta, ua ia faavalea latou ae mailei mai ai tupe. E fealuai le tamaitai i se taavale rental ma e o faatasi ma le isi tina na la toalua, ma o le isi lea mafuaaga e lei oso ai ni masalosaloga o le aulotu ma le mafutaga a tina ina ua amata fesagaiga ua faaiu puta i le faamasinoga e pei ona tagi ai le aulotu ma molia e leoleo le tamaitai o Eseta i le taufaavalea.