Pule Faatonu o le Radio Samoa, Ps Lui Ponifasio ma le Faletua ia Ane Ponifasio, ma nisi o malo faaaloalogia ma le aufaigaluega i le taimi nei ma taimi ua tea, a’o sauni e feula le keke  o le 20 Tausaga - Photo: Canaan Ponifasio

O le saunoaga faafetai a le susuga i le faafeagaiga ia Lui Ponifasio i le po o le Aso Faraile na patipatia ai le atoaga o le 20 tausaga o le Radio Samoa na ia saunoa ai. 

“O le viiga ma le faafetai i le Atua ona o lona alofa ma lona agalelei auā ana lē seanoa le Atua e lē mafai e tatou ona faia se mea, auā fai mai le Tusi Paia, ‘A lē atinae e Ieova le fale e galulue fua i tatou.’ Ia viia ai pea le Atua i mea uma ua tatou faia. O le 20 tausaga e vave tele lona alu, e pei e foliga mai o se mea e lei umi ona fai ae atoa le 20 tausaga.”

Na toe faatepa e le susuga i le Faafeagaiga le auvalaaulia ma Samoa na potopoto i lea po i le amataga o le Radio Samoa. “Ina ua amata lenei galuega o le leitio Samoa, sa leai ni metotia, leai ni fuafuaga (plan) leai se tupe, ae o loo iai lava le naunautaiga e fai se mea ae lē tagolima. Na sosoo lea o le lē tagolima ma le tagi i lima, ma o iina na amata ai le galuega, ina ia aua ne’i avea le lē tagolima ma ‘alofaga e lē mafai ai ona tatou faia se mea. Ae o le tofa mamao ma le moemitiga sa iai ina ia mafai e tagata Samoa ona faalogologo i le latou leitio i le latou lava gagana i le 24 itula o le aso.”

O Ianuari i le tausaga 1999, na amata ai loa ona tau faaolaola le Radio Samoa i totonu o Aukilani mai lona uluai ofisa faasalalau i Upper Queen Street i Aukilani, ae na’o pese na amata ona tata ai. Peitai ua galue le Atua ma ua amata foi ona iai auala ma metotia i le faatinoina o le galuega i lena tausaga ma oo ai loa ia Mati i lona aso 8, ma aloaia ai loa le tatalaina o le Radio Samoa i totonu o Aotearoa ma amata ai loa ana polokalame faasalalau.

O le Maota Samoa i Karangahape Road sa fai ai le sauniga lotu lea na tatala aloaia ai le auaunaga a le leitio i lena tausaga; e lē toatele nisi o le atunuu sa auai, ae sa maua le avanoa e faasalalauina ai le saunoaga faamanuia a le Palemia o Samoa le Susuga ia Tuilaepa Sailele Malielegaoi i lea sauniga. O loo manatua pea e Lui Ponifasio le tala a le alii Palemia na ia faapea mai ai “Sole fai ia ola lena leitio i alu alu foi pe.” E ui o se tala faatalasua, ae o se lu’itau na fafagu ai le loto finau o le susuga i le Faafeagaiga, e tapu’e le atina’e auā e lē tatau ona toe pē le leitio.

E tele faafitauli sa iai i le tau amataina o le galuega na feagai ma le susuga i le faafeagaiga ia Lui Ponifasio auā na ia ta’ua, e amata le galuega e leai sona silafia i le amataina o se pisinisi, o loo iai le naunautaiga e fai le leitio ae lē iloa amata, ae lei faavaivai ai le finau e saili malo ina ia taulau le moemitiga.

O le susuga i le faafeagaiga ia Ene Sagala o le faatamā lea o le galuega i le amataga, sa ia faamalosi ma tatalo ma faufautua i le susuga i le faafeagaiga ia Lui Ponifasio ma le faletua ia Ane ina ia malolosi o laua loto e faataunuu le faaaliga ma le moemitiga.

E lei noatia le agaga faagaeetia o le susuga ia Lui Ponifasio, i le tautua matavela a le Susuga ia Tavai Meni, faapea le susuga ia Semau Mataio, auā o laua nei sa o latou galulue faatasi mai le amataga lava o le leitio, seia oo mai i le taimi lenei ua atoa le 20 tausaga, o loo galulue pea. 

E lei faagaloina Afia i si ona vao, i le faafetai faapitoa a le susuga i le Faafeagaiga i lona faletua ia Ane, i lana lagolago ma lona lototele aemaise o le onosai. “O Ane o loo nafa ma le faafoeina o le leitio, e lē gata o le vaaia o le aufaigaluega, o le totogiina o pili ma ia mautinoa o sologa lelei le galuega. O le taimi nei o loo feagai pea Ane ma le faafoeina o le leitio.”

O le saunoaga foi a le susuga i le faafeagaiga i lea po, na ia toe manatua ai tina ma tamā matutua sa mua i malae i le amataina o lenei galuega i le latou faautautaga loloto ma le faautaga mamao na lagolago ai le amataga o le galuega. O le toatele o i latou nei ua fai i lagi le folauga ae o loo ola pea a latou galuega lelei ma moemitiga e ala ia i tatou o loo feola pea i lenei soifuaga.

Na sifi ese mai le leitio mai si ona tamai potu sa amata ai i Upper Queen Street i lona ofisa fou i Nikau Street i Mt Eden, ma faaauau mai lana tautua. O le vaitaimi foi lea na amata ai ona soosoo itula o faasalaluga a le leitio, seia oo ina ausia le 24 itula e pei ona iai i le taimi nei.

O le tausaga 2007 na sifi mai ai loa le leitio i lona ofisa fou i le 3/36 Hobill Ave i Manukau ma faaauau ai pea e pei ona iai i le taimi nei. Ua tupu ma ola le galuega ma ua lautele foi le moemitiga e pei ona naunau iai le susuga i le faafeagaiga ia Lui Ponifasio ma le faletua ia Ane.

O le 20 tausaga o se folauga umi, o se folauga saili malo, o se taumafaiga e lei faasi’ulaumata i se manuia o se tagata e toatasi, ae ia manuia le toatele, o se tautua foi ua tapu’e ai le gagana, aganuu ma le ola faatuatua e auala atu i ana polokalame faasalalau. O se tautua foi ua toomaga iai le vaivai mai galuega, ma eva ai tuaa sinasina nofofale o le atunuu, e ala i le faasoa mai o latou finagalo i luga o le leitio i aso taitasi.

Ua fitu aso o le vaiaso ua tautua ai le Radio Samoa i totonu o Aukilani i le 24 itula i le aso, ua lē gata i le faalogologo o tagata i le leitio i maota ma laoa ae ua mafai foi ona faalautele le galuega a le leitio i luga o upega tafailagi e ala i le facebook lea ua maimoa ma faafofoga mai ai tagata mai isi atunuu o le lalolagi.

O le tu mati’e, ma le tumatila ma le faamanuiaina o lenei atina’e, ua atoa le 20 tausaga o lana tautua, na faatumulia ai le Manukau Event Centre i le Manukau i le mamalu o le atunuu e patipatia le faailogaina o le 20 tausaga o le leitio ma lana tautua. Sa faamalo’ulo’u atu le afioga i le Konesula o Samoa i Aukilani, Afioga Faolotoi Reupena Pogi faapea le afioga i le Minisita o Tagata Atumotu o le Pasefika i Niu Sila nei, Afioga Aupito Su’a William Sio, aemaise susuga i Faafeagaiga ma o latou Faletua, o faauluuluga o pisinisi ma kamupani, o i latou o loo faia polokalame i luga o le leitio, aemaise o le lautele o le atunuu sa molimauina lenei afiafi tāua.

O le susuga i le faafeagaiga ia Tavale Mataia na ia tatalaina le polokalame i le sauniga lotu, ona saunoa lea o le Fofoga o le po le afioga Peseta Savea Al Harrington Lavea, e faafeiloai le mamalu o le auvalaaulia. O lauga faapitoa o le po na saunoa iai le afioga i le Minisita o Tagata Atumotu o le Pasefika i Niu Sila nei, Afioga Aupito Su’a William Sio, faapea le Konesula o Samoa i Aukilani, Afioga Faolotoi Reupena Pogi sa fai ma sui o le malo e momoli faamanuiaga i le aso fanau o le leitio. 

O le susuga i le faafeagaiga ia Lui Ponifasio na saunoa e faailoa le tala otooto o le galuega i lona amataina faapea lana faafetai i le aufaigaluega a le leitio o loo tautuaina le atunuu i le taimi nei. 

O faafiafiaga o le po sa saasaa ai le ausiva a tamaitai o le Malu Measina, sa faafiafia foi nisi o tamalii sa amataina mai le aufaipese lauiloa o le Tiamaa, aemaise le aufaipese sa faatulaga e tāina musika o le afiafi atoa, le 20/20 Band, faapea ai la le faafiafiaga na tapena iai le aufaigaluega a le SMG e ala i le latou mauluulu na vaaia ai le onomea o le aufaigaluega, aemaise o le laufofoga fiafia, ae faaiu i le latou pese faasamoa na talatala ai talaaga o le leitio mai le amataga a’o logo faatutuila le aumaimoa. 

Na tauaaoina foi ni meaalofa faapitoa e faafetaia ai le tautua ma le sao o le afioga i le Faletua ia Eti Fuimaono McCarthy, le Faletua ia Lilia Sagala, aemaise Tavai Meni ma Semau Mataio Sagala, o latou nei na amataina mai le tautua a le Radio Samoa i le 20 tausaga ua tuanai. Aemaise o faigameaalofa mo le mamalu o le atunuu sa auai atu. E felanulanuai le taumafataga na saunia auā le atunuu ma le auvalaaulia.

Na maua foi avanoa o le aufaigaluega e faailoa ai o latou suafa auā o le toatele o tagata faalogologo e na’o na faafofoga i leo ae lei vaai i le aufaigaluega. 

Na taualuga polokalame o le afiafi i le agaga faafetai o le aufaigaluega ma le pulega e pei ona fai ai le susuga ia Papaliitele Lafulafu Peo ma sui o le aufaigaluega e faaleoina le faafetai i lea po mo le mamalu o le auvalaaulia, ma tatala ai loa le filialii.