Maligi loimata ootia ua lē faamaonia moliaga

 O le tamaitai loia sa faauluulu iai le vaega o tulafono a le Pulega o Feoa’iga i luga o le la’ueleele, Anoanoa’i Pepe Lafai

Soo se tasi e feagai ma ni tuua’iga e oo i luma o le faamasinoga, e lē faigofie ona maua se malologa o le mafaufau, auā o le vaai atu a tagata ma tala feaveai solo aemaise o le va ma le aiga ma ana uo e lē o se mea e faigofie ona ua faalumaina. E faapena lagona na iai le tamaitai loia o Anoanoa’i Pepe Lafai a’o tatali se faaiuga o suesuega a le faamasinoga i ona moliaga sa tuua’ia ai e mafua i le faatinoina o ona tiute a’o avea ma faauluuluga o le vaega o mataupu tau tulafono a le Pulega o Feoa’iga i Luga o le laueleele le Land Transport Authority. Na molia faatasi le tamaitai loia ma se tasi o Pule Sili lagolago o lea pulega a le Malo le tofa Mata’afa Sepelini Poufa.

O le masina o Ianuari o le tausaga 2018 na faia ai se faaiuga a le Kapeneta e lē toe talia ni taavale la’upasese ua ta’i sefululima tausaga le matutua e lesitala mo le tauaveina o pasese. O Anoanoa’i sa molia i tuua’iga o le faia o ni gaioia e faasese ai faamaumauga o le lesitalaina o ni taavale a’o galue i le Pulega o Feoa’iga i Luga o le laueleele. Sa molia ai foi i se moliaga e tasi o le gaoi a’o avea ma tagata faigaluega, peitai o le moliaga lea e tasi na toe soloia ma aveesea e le faamasinoga ina ua toe faaui i tua e leoleo. O le mafuaaga ona ua lē mafai e leoleo ona tuuina atu ni mau e faamaonia ai. O le faaiuga lea na faia a’o faagasolo le valaauina o molimau a leoleo i le suesueina o moliaga o le tamaitai loia ma le tofa Mata’afa Sepelini. 

Ua taunuu le faamasinoga i sana faaiuga na fofogaina i le vaiaso ua mavae i le soloia o moliaga uma e fa o Anoanoa’i Pepe ona ua lē mafai e leoleo ona faamalieina aiaiga o le tulafono o le tuu atu o mau e aunoa ma ni masalosaloga tatau e faamaonia ai ni tuua’iga faasaga i se tagata. “Ou te faafetai i nai o’u mātua na malaga mai lava i Niu Sila e tapua’ia lo’u faamasinoga, faafetai foi isi o’u toalua ma si a ma fanau”. O le lagona ootia lea ma le fiafia o le tamaitai loia ina ua tapa sona finagalo a’o agai i fafo ma le potu faamasino na lau ai le faaiuga a le afioga i le tamaitai faamasino o Mata Keli Tuatagaloa. E lei umi se finagalo o le tamaitai loia ona sa lē mautonu ona lagona i lea taimi ona e pei lava o tagata uma e faamamā le suafa i ni moliaga e oo i le faamasinoga, e pei o ni ufi e tutupu lagona o le faafetai i le Atua ua iu manuia. 

O Mata’afa Sepelini e 24 moliaga sa molia ai e leoleo ma o tuua’iga e faasino foi i le faasese o faamaumauga ma toe fesuia’i faamaumauga i luga o le masini komepiuta o loo lesitala ai taavale la’upasese ma taavale e lē la’upasese poo private vehicles. O le mae’a ona suesue moliaga o lea Pule Sili lagolago na soloia ai ma faaleaogaina ona moliaga e 18 ae faamaonia moliaga e 6. E lei fia faaalia se finagalo o Mata’afa Sepelini ae o loo tapena lana loia mo le toe apiliina o le faaiuga.