Maliu faafuasei Michael Tamoaieta

O se tala fa’anoanoa tele le maliu fa’afuasei o le alii talavou o Michael Tamoaieta, 23 tausaga. E le’o mautino le tala sa’o o le maliu faafuasei ai o le alii lakapi ae ua lagona i totonu o le taaloga i Niu Sila atoa le agaga faavauvau i lenei tala faanoanoa. 

O Michael e taalo i  le ‘au a le Auckland Blues, a’o lana Iuni  o North Harbour. Na fanau o ia i Samoa na amata ai ona taalo i le lakapi, sa fai o ia ma sui o le ‘au fili Samoa U20’s, ao lei malaga mai i Aukilani ma lona aiga ma aumau ai. 

Ua ta’ua e le CEO a le Blues, Michael Redman le fa’anoanoa tele o le Ofisa i lenei tala faanoaoa.  Fai mai a ia, “O Michael o se tagata talenia tele mo le Blues. Ae o le taimi nei o loo taulai le vaai a le Blues, e fesoasoani i lona aiga i lenei taimi  faanoanoa tele.” 

Fa’apea foi ma le Pule Sili o le Iuni a Horth Harbour na momoli atu lana faamaisega i le aiga faanoanoa.  “E momoli atu i le aiga o Michael o matou alofa’aga ae maise Helen ma le la tama o Aihana. 

O le’a misia e matou Michael ma ona uiga tau sa’afia.” 

Na fa’aleo foi e Steve Tew le Pule sili o le NZ Rugby lagona faanoanoa mai le ofisa autu o le Iuni Lakapi a Niu Sila. Fai mai a ia o Michael o se tagata faamoemoeina i totonu o le Blues. Sa taalo foi o ia i ‘au a a’oga a Niu Sila. 

“E lagonaina e tagata uma e masani ia Michael le tiga alofa ona o le vave motusia o le mafutaga.”  O le tala o le maliu faafuasei o le alii talavou na oo atu ile Blues i Argentina a’o tapena mo le latou taaloga ma Jaguares i le Aso Sa. 

Na fa’ate’ia le ‘au ona o Michael o se tagata na taalo i le ‘au i le tausaga ua te’a. E lua ana taaloga mo le Blues i le 2018, ae e lei maua sona avanoa i lenei tausaga. 

I le maua ai o le tala, na talosagaina ai e le NZR laufali uma e fa’a pipi’i lipine uliuli i o latou toniga i taaloga o le faaiuga o le vaiaso ua te’a.  O le vaiaso nei e taalo ai le Blues i North Harbour Stadium ma le Sunwolves, mae o le’a avea lea avanoa ma taaloga taua e manatua ai Michael ma lona sao i le taaloga i North Harbour, aemaise Aukilani ma le Blues.