E mamafa faasalaga faalenuu a se afioaga i Savaii pe a iloa se tasi ua ia faia se solitulafono matuia e faasino i ni feusuaiga e faia i se auala e soli ai le tulafono. O le molimau lea a se matai o le nuu i luma o le Faamasinoga Maualuga, a o lei fofogaina le faasalaga mo se matai o le nuu na molia e leoleo i le taumafai e faia se faiga aiga fai faamalosi ma se tamaitai 16 tausaga le matua e pei ona faaalia e leoleo o se tausoga o lē ua molia.
Ua faasāina e le faamasinoga ona faailoa suafa o lē ua molia ma lē na aafia ona o le maaleale o le maataupu aemaise e vavalalata sootaga o lē na tagi ma le alii 30 tausaga ua faaipoipo ma ua iai lana fanau.
O le po o le Aso Sa 13 o Oketopa o le tausaga nei sa inupia ai lē ua molia ma nisi o lo latou nuu, mulimuli ane fetaui ma lē na aafia ma fai loa i ai la te o i le faleoloa se‘i aumai sana credit o le telefoni.
A o agai atu i laua i le faleoloa na faafuasei ona oso i totonu o se pa lē ua molia ma ia fai loa i lē na aafia e alu atu ma ia i totonu. Peitai na faaalia e leoleo na taumafai le teineitiiti e alu ese ae na mau ai lē ua molia i lona lima ma toso faamalosi atu.
Na ia pupuni ai le gutu o le teineitiiti ma ia faia ai ni gaioiga solitulafono. A o faia lea gaioiga na tauvalaau ane le uso o le teineitiiti ma faapea ona tuu ai le gaioiga na faia e le alii 30 tausaga ae tuu le teineitiiti e alu.
Na ta‘u loa le mea na tupu e lē na aafia i lona tina ma oo ai loa i le nuu mulimuli ane logo leoleo. O le aso 25 o Novema o le tausaga nei na faatulaga e suesueina ai molimau o le moliaga ina ua tetee lē ua molia, peitai o le aso lava lea na faailoa ai e le loia a lē ua molia le suia o le tali a le alii i le ioe i le moliaga e tasi o le taumafai e faia se faiga aiga fai faamalosi.
O le silasila a le faamasinoga e leai ma se itu lelei e faasino i le alii ua molia e maua ai se faamāmā avega i se faasalaga faafalepuipui, e pei ona talosaga le itu a leoleo e amata se faasalaga i le ono tausaga pe a fua i le sefulu tausaga o le faasalaga maualuga mo le solitulafono o le taumafai e faia se faiaga aiga fai faamalosi pe a faamaonia.
Sa silasila le faamasinoga i le folasaga a le loia mo lē ua molia i le ioeina o le moliaga ma le faasalaga na faia e le nuu, lea e selau aumatua, sefulu pusaapa, ono puaa tetele, fāselau tala le tupe ma le faataumamafaina o le nuu. O se sala e tusa ma le sefulutasi afe lona faatupeina ma o ni itu lelei lea.
Peitai na faaalia e le tamaitai faamasino o Ida Malosi, e ogaoga ma matuiā le solitulafono na faia ona ua lē malu le teineititi i le vaaiga a lē ua molia i le tulaga o i laua o se tausoga. O le matua tele o lē ua molia ma le laitiiti o tausaga o le teineititi o se isi lea itu matuiā i le solitulafono na faia. Na toesea le tausaga ma le ono masina mai le faasalaga e ono tausaga, totoe ai tausaga e fā ma masina e ono ua nofosala ai lea alii i le falepuipui.
