Ua toe nei o se aga ona tuta manuia atu lea o le tatou sā i le faaiuga o lenei tausaga, ma ua amata sili foi mea le seuga a tautai mai faatautaiga ma faiva eseese o lenei tausaga. O taimi o le filogia ai o lagona o le fiafia ma faafetai ua mapu mai galuega fita sa feagai ai i le tausaga atoa, ae o lagona faigata foi i le faamavae atu i uo ma ē ua pele sa militino ma nutimea faatasi mai i galuega eseese o le tausaga.
E faapena lagona na lagonaina ma molimauina i sui taitasi o lea mafutaga tatalo iloga i totonu o Aukilani i Saute nei, ina ua faamae‘a aloaiaina galuegafai o lenei tausaga, i le Aso Gafua, 2 Tesema 2013. Na vaaia le lalelei ma le laufofoga fiafia o sui taitasi, aemaise lava foi o le matagofie o la latou togiga, pei ona silasila ane i ai.
Sa amataina le polokalame i le sauniga lotu sa taitaia e le Faafeagaiga ia Afa Pulotu (Au Uso Kerisiano Magele), tatalo faamanuia Pastor Pati Faaiuaso (Au Uso New Lynn). Ona faafeiloai aloaia lea o le mafutaga, malo ma le paia o le atunuu sa auai, ma faafoeina polokalame uma o le aso, e le susuga i le Co-ordinator, Pastor Mataia Fatu Tuu) (Au Uso Kerisiano Manukau). Ae o le Faafegaiga is Sigalu Tuua ma le faletua ia Fale o loo malaga e lei auai.
Ona asiasi aloaia ai lea o galuega taulima a le itupa malosi o tina, e iai taga aluga felanulanuai, ula ma faasolo eseese, cover o cusions, ma isi meataulima mananaia. O nai tuaa ua matutua le soifua, ae lelei i le tatalo, lelei ma vave gaioi i meataulima, ae toe lelei foi i tausinio i taaloga e iai le Pele suipi ma le Komino.
Siamupini le tina matua ia Losi Maua i le taaloga o le pele suipi, Faataliga Tafili maua le ipu i Komino a tina, faapea foi Seumanu Ane Betham i le isi Komino, ae o Faalogo Talavini Kuresa i le siamupini o Komino a le itupa o tamā, e 457 ana malo i lenei tausaga, ua mau ai le ipu o le 2014.
Ua tuuina atu foi le ipu ua faaigoaina o le Au maopoopo, i le Au a Tamā i lenei tausaga, le ipu sa saunia e le Toeaina ia Tupai Robertson ma le faletua ia Malu.
Ona alo ai lea i le taumafataga tele sa saunia lava ma tapenaina e le itupa paia o le faletua, tausi ma saoao, ma tina uma o le mafutaga.
E momoli foi le agaga faafetai o le mafutaga i susuga i faafeagaiga o taitaia ma faatautaia le galuega fita, sa fai ai ma o latou sui le tamā matua ia Tupai Robertson, faaopoopo i ai le tina matua ia Losi Maua e fai ma sui o tina.
Ae o le susuga i le Toeaina ia Lemafua Sema sa saunoa e fai ma sui o le mafutaga e momolia le meaalofa mo le Aufaigaluega ma malo asiasi mai i lea aso. Ona tali fuaitau lea o le afioga ia Afoa, faaopoopo i ai le fetalaiga a Tauaa, e talifuaitau e tusa ma le fetalaiga a Lemafua. Ona faaiuina lea i le faafetai a le Co-ordinator Pastor Fatu Mataia, ma faaiuina ai i le tatalo a Pastor Afa Urima Moasegi Pulotu.
Malo tatalo, malo galue, malo tauatai, malo onosai mo le galuegafai o lenei tausaga. Avea foi lenei avanoa e momoli tele atu ai faamanuiaga mo le Kerisimasi ma le Tausaga Fou, ua tu lalata atu i ai. Faafetai tele foi i le Matagaluega o le Vaka Tautua ma le pulega mo le lagolagosua mai i lenei mafutaga, faapea foi le sao a le Toa Pasifika, mo faamalositino i lenei tausaga. Faafetai tele atu foi aiga ma alo ma fanau o nai nei tuaa matutua, i o outou taimi e molimoliina mai ai i latou nei i le mafutaga i vaiaso taitasi.
Avea foi lenei avanoa e valaaulia atu ai soo se tuua matua 65 tausaga i luga, e leai se mea o mafuta ai, ae fia maua se avanoa e tafafao ai ma faamasani ma isi tuaa matutua, e afifio mai pe valaau mai foi mo nisi faamatalaga (09-2634063), i le tausaga fou. O le a toe amataina lenei mafutaga i le tausaga fou, Aso Gafua, 3 Fepuari 2014.
Faafetai atu foi i le susuga ia Aso Falanaipupu mo le lagolagosua mai i lenei mafutaga, aemaise lava le agaga faafetai tele i le Radio Samoa, susuga i le Faatonu, tamaitai pule ma le pulega, faapea le Nusipepa o le Samoa Times, mo le faasalalauina o faasalalauga ma ata o lenei mafutaga. Faafetai, faafetai tele lava. Manuia le Kerisimasi ma le Tausaga fou.
