O le Aualofa o le mafutaga a tina o le Uarota Samoa, a le Ekalesia a Iesu Keriso o le Aupaia o aso e gata ai i le pitonuu o Heidelberg.
O le tulata ai i le faaiuina o galuega o le tausaga, lea na tasi ai se finagalo e faalauiloa galuega taulima na gaosi i o latou lava aao, ma faatau atu i le paia ma le mamalu o le atunuu, aemaise o le ekalesia.
Na amataina le faamoemoe i le sauniga lotu na taitaia e le susuga i le Epikopo le susuga ia Fiu Talosaga Iosua Fiu, ma le lagolagosua a ona sui Epikopo le susuga ia Naoupu Papalii, ma Simeona Fenunuti.
O le peresitene o le mafutaga a tina le faletua ia Motu Tuiala, a o le faletua ia Vai Alema na fai ma fofoga o le afiafi. Na mae‘a le sauniga faagasolo ai faafiafiaga eseese o le afiafi e ala i tala faatino ma siva, ona tatala ai lea o le avanoa e maimoa ai i galuega taulima ma faagasolo ai le faatauina.
O nisi o oloa gaosi a nai tina e aofia ai le tele o laei na su‘i lava e latou, o laei o tama, ofu o fanau, laei o tina, o ie ufi laublau e lalaga i vulu (kolose), taumafa ma le tele lava o oloa eseese, o le susuga ia DJ Vio o le Cocoa Flavaz na feagai ma le musika na see lelei ai le taliga o le sua a o faagasolo le afiafi.
O se tasi o mitamitaga i le Aualofa i lea afiafi, o le agaga faamaopoopo o le tina matua ia Leauuta Fiu, o se tasi o tuaa sinasina o loo tapuaia pea le alofaiva o tamafanau a le Ekalesia. Maualuga le viiga o le Atua ina ua ta‘ape le mamalu na potopoto ma le mama ua lomi ma le vaa ua goto ona o faaaloaloga, “E au lava le inailau a tina”.
