O se luitau tele lava mo le au Lakapi a le atunuu le Manu Samoa, a o faasauni atu le taaloga ma Iapani i le faaiuga o le vaiaso na tea nei. Mafua lea luitau ona o le taimi mulimuli lava na feiloai ai le Manu ma Iapani i le Apia Park, na faiaina ai le Manu Samoa i le Taamilosaga o le Pacific Nation Cup.
O le aoauli la o le Aso Toonai i Iapani lea na toe feiloai ai loa nei ‘au e lua i le malae o Prince Chichibu Park i Tokyo, i le amataga o le malaga taamilo a le Manu i Europa.
O le amataga lava o le taaloga sa fai si faaletonu o le Manu.
E lē gata i le leai o se sootaga o tama taaalo i totonu o le malae, leaga le puipui, toe tele mea sese e pei ona sa maitauina.
O le ala lea na uluai laasia ai e Iapani le laina sikoa a Samoa i le faato‘ā 7 minute o le taaloga, mai le latou Pou numera 1 le alii o Koliniasi Holani, ma faaopoopo ai latou ‘ai mai le latou 3 muamua na maua i le sala, ae faato‘ā 3 munute.
Na ova le kiki o le sikoa ma 10 ai Iapani i le leai a le Manu i le ‘afa muamua.
O le amataga o le ‘afa lona lua na faato‘ā tau ‘ai ai le Manu Samoa i le sala na kiki e le alii Kapeteni ia Lolo Lui, ona toe faaopoopo lea le isi 3 ina ua toe sala Iapani ma maua ai ‘ai e 10 – 6.
O le toe 20 minute o le taaloga ae sikoa loa le ‘afa a le Manu Samoa le alii o Kahn Fotualii, lea na ova ma le kiki e Lolo i le pou, ma sili ai loa Samoa.
Na fiu le au matapii a Iapani e toe feeli atu ae ua lelei mai le puipui a le Manu ma mae‘a ai le taaloga ina ua manumalo Samoa i ‘ai e 13 – 10. Ua toe ea ai nei le toilalo o Samoa ia Iapani mai ia Fepuari i le Apia Park lea na alu ai le talafaasolopito a Iapani le malo ia Samoa.
Ua agai atu nei le Manu i Aialani mo le isi ana taaloga e sosoo ai.
O le ‘au atoa lenei a Samoa na taaalo faatasi ai ma le ‘au faaleoleo:
SAMOA
Lolo Lui (c); Mikaele Pesamino (Uarotafou Setu 63), Josh Tatupu, Jamie Helleur,
Sinoti Sinoti; Josh Keil (Faatalatala Fagasoaia HT), Kahn Fotualii; Logovii Mulipola (Viliamu Afatia 50), Andrew Williams, Anthony Perenise; Simaika Mikaele, Maselino Paulino (Levi Asi Faamatala 63); Ofisa Treviranus, Afa Aiono, Richard Muagututia (Falemiga Selesele 62)
