O le fusuaga tele i le Aso Faraile 19 Novema i Aukilani lea e fa’afoeina e le Vili’s Boxing Gym o le a fusu ai alo e toalua e malaga mai Samoa; le alii o Pele Faumui (middleweight) ma Oli Filimaua (welterweight).
Peitai o le vaiaso nei ua fa’aopoopo ai le isi auaunaga a le susuga a Ofisa ma le faletua ia Cammy, lea ua tatala ai le faleotiulu (barber shop) ua fa’aigoaina o le Vili’s Uppercuts i lalo o le la falefusu i Manurewa.
I le tatalaina o le Vili’s Uppercuts, na fa’apea ona fa’alauiloa ai foi le fa’amautuina o le sootaga fa’apaga a le Vili’s Gym Boxing Promotion ma le Event Polynesia Boxing o lo o fa’afoeina le ta’amilosaga o fusuaga o le Samoa Pro Am Fights i Apia fa’apea le ta’amilosaga o le Manukau Pro Am Fights i Aukilani.
Fa’aalia e le fetalaiga Teleiai Fereti Puni o le pulega a le Event Polynesia, “O le taimi muamua lenei o le a ta’aalo ai tama fusu fa’apolofesa a le Event Polynesia i se fusuaga a Vili’s Gym Boxing Promotion. Ua tatala ai foi le avanoa mo tama fusu a Vili’s Boxing Gym e ta’aalo i fusuaga a Event Polynesia i Aukilani po o Samoa.”
O le susuga ia Ofisa Vili e mai le afioaga o Magiagi i Samoa ma ua loa tausaga o avea ma tama fusu, sosoo ai ma le fa’atuina o lana falefusu ma avea ai ma promoter e oo mai i le taimi nei.
Saunoa Ofisa, “O se la’asaga lelei tele mo tama fusu Samoa le sootaga ua fa’amautuina nei ma le Event Polynesia Boxing.
O se avanoa o le a tele ai fusuaga fa’apolofesa mo le tapenaina o tama fusu Samoa e iai le talitonuga e gafatia le oo atu i fusuaga tetele a le lalolagi.”
Tatala le auaunaga a le Vili’s Uppercuts i lea taeao i le fa’afugaina o le ao o le fetalaiga a Teleiai sosoo ai ma alii fusu ia Warren Fuiava, Kalolo Fa’atua ma le tama tuai o le maea ia Iosua Anae lea o le toe foi i le maea i le fusuaga o lumanai nei.
E sefulu paga o le fusuaga i le Aso Faraile 19 Novema 2010 lea e faia i le Netball Stadium i le 94 Browns Road, Manurewa; amata i le 6 i le afiafi.
Fa’alia e Ofisa, “O paga mataina o lea afiafi o le a fetaui ai Pele Faumui o Samoa ma le alii o Joshua Tai o le Atu Kuki i le aupaga middleweight, ae faipele Oli Filimaua o Samoa ma Ryan Tauaki o Niu Sila i le aupaga welterweight.”
O le alii o Pele e mai afioaga o Vaiafai o Iva ma Lalomalava, ae o le alii o Oli Filimaua e mai afioaga o Fagalii ma Fa’ala Palauli ma o lana uluai fusuaga lea i totonu o Niu Sila.
Mo nisi fa’amatalaga, fa’afesootai le Vili’s Boxing Gym i le (09) 268-7476.
