O le taamilosaga tele faitaulia sa faia i le aso 21 e oo atu i le aso 24 o Oketopa a le Taekwondo, sa faagasolo lea i Canberra le laumua o Ausetalia. Atonu e maitau e nisi o le aufaitau, e maoa‘e foi le saili malo o nei alo laiti mai Samoa, auā e lei mamao atu foi sa autovaa ane ai i Niu Sila i lenei lava taaloga, e toeitiiti faalua pe faatolu na malaga mai i Ausetalia nei i le tausaga.
E ui e tagi lava i lima le faatinoina o nei feoaiga ona o le alualu luma o lenei taaloga, ae faamanuiaina lava e le Atua, o se saunoaga lea a le susuga ia Faalavelave Frank Frost, o loo taulamua i Ausetalia ma lauiloa i lenei taaloga.
O le paga faitauina lava o lea fusuaga o le susuga ia Kaino Thomsen-Fuataga Kasimani Lautusi (Team Captain) o loo numera tasi pea ma siamupini i isi setete o Ausetalia faapea soo se atunuu e fealuai i ai.
O loo ia umia le fusi auro lanu uliuli i le paga mamafa.
O le alualu i luma o le taumafaiga a nai alo talavou mai Samoa, na saunoa ai le susuga i le Head Coach faava-o-malo ia Faalavelave Frank Frost.
Talofa e, maimau pe ana silafia e le Palemia ma le malo o Samoa le tautiga o nai nei fanau, se‘i manatua ane i latou.
O le itu lea na avea ma ala na malolosi ai le aufusu ma faamanuiaina ai i nei pine auro.
E ui lava i ia manatu faivavale, ae faafetai tele mo le tapuaiga, o lea foi ua faitauina Samoa i pine auro e 5 ma pine siliva e 2 i lea foi faagatama.
5 Pine Auro
Zoe Thomsen-Fuataga (10 tausaga) – Junior 40-47kg Class Blue Belt
Rose Magele Vili (10 tausaga) – Junior Girls 40-47kg Class Yellow Belt
Henry Faolotoi (16 tausaga) – Junior Heavy Weight Yellow Belt
Shon Lotolagi Soo (16 tausaga) – Junior 78-80kgs Class
Kaino Thomsen-Fuataga – Open black belt heavyweight
2 Pine Siliva
Paul Raki (10 tausaga) – Junior 30-37kg Class Yellow Belt
Shon Lotolagi Soo (16 tausaga) – Open 78-80kgs Class Red Belt
E lē uma le agaga faafetai o le susuga ia Faalavelave Frank Frost ona o le alofa o nisi o Samaria agalelei sa foai e ala i taumafa ma seleni sa fesoasoani ai i nai tamaiti.
O le isi itu o la latou molimau ona o se avanoa tāua lea ua mafai ai ona afea le maota fono o le Palemene a Ausetalia o loo i le laumua i Canberra.
Sa maualuga le tapuaiga a le Afioga i le Konesula o Ausetalia – Lemalu Tate Simi, faapea Hecta Petersen ma le faletua (New Castle)
O le faafetai faapitoa e tauala atu i le Samoa Times ia i latou uma sa fesoasoani i soo se vaega, tau lava ina ia silafia ma mautiona e lē pa‘ū fua lo outou afu sisina. Faamanuia tele le Atua.
Ua toe taliu atu nei i Samoa le faigamalaga ma le agaga fiafia ona o loo a‘e manuia pea faagatama a le Taekwondo i soo se mea e malaga i ai.
