E lē o mautinoa i le taimi nei poo ai o le a filifilia ma tulai mai e faaauauina le tofiga taitaifono o le tino o loo vaaia ma pulea leitio e lua a tagata atumotu o le Pasefika i Niu Sila, le Niu FM ma le Radio 531 PI.
Ua mafua lea tulaga ona ua mae‘a nei ona faalauiloa faalauaitele i le fonotaga faaletausaga sa faia i Aukilani i le po o le Aso Tofi na mavae, le faamavae o le tamalii o le atunuu mai ona tofiga taitaifono sa ia tauavea, i le masina o Novema o le tausaga nei lava.
Sa fesiligia le afioga ia Faamatuainu i le mafuaaga o lana faaiuga ua fai, i lona faasee ese mai i le tofiga ma le nofoa sa ia taitaia ai fonotaga, atoa ai ma isi atina‘e mo leitio e lua a le Pasefika. Sa fesiligia e le Samoa Times, ona o se tofiga ua leva ona umia ma tauavea e lea tamalii o le atunuu.
Sa fia iloa ma malamalama atili i le lumanai o leitio faasalalau a le Pasefika, aemaise lava o le Niu FM, talu ai suiga o le faiga malo o loo tulai nei.
E lē gata i lea ae pe ua iai nisi vaega e lē o aliali mai ua mafua ai ona faamavae, talu ai o ia o se tagata finau tele ma tu malosi mo le finauina o mataupu e uiga i leitio a le Pasefika.
Peitai o le tali mai a Faamatuainu, sa ia faailoa ai, ua tusa ma le valu tausaga o loo ia tauavea pea le tofiga, ma ua oo i le taimi ua tatau ai ona fai se suiga.
E lē matagofie foi le faaiiloloa ai na o lona tagata, ae ua tatau ona laasia se isi taitai fou mo se suiga ma le aga‘i i luma o le galuega.
E lē gata i lea ae sa ia ta‘ua foi nisi o suiga a le malo ua faataoto nei mo leitio a le Pasefika, ma o ia suiga e pule lava le faigamalo e tulai.
Sa ia ta‘ua foi ni talanoaga ma le malo e ala i minisita o faasalalauga a le atunuu, ma le minisita o tagata Pasefika, ma sa toe tuu ane ai le avanoa mo ia, peitai o lana lava filifiliga, ua oo mai le taimi o se suiga, ma o lea foi suiga o le faasee ese lea o lona tagata, ae toe filifili ane se isi e faaauauina le galuega.
O lona lava talitonuga o le valu tausaga talu ona taitaifono, ua matuā umi lava lea mo se tagata e toatasi.
E tele ni vaega lelei e manatua ai pea lenei taitai talu ona tau amata mai le leitio fou a le Niu FM. Sa lē faigofie fonotaga faalauaitele sa faagasolo i le atunuu atoa i le tau aoaoina mai o finagalo ma tuufaatasia tagata Pasefika ina ia mauaa le talosaga sa tuuina i le malo i lona vaitaimi muamua sa taumafai ai se leitio a le Pasefika e soo ai Niu Sila atoa.
E oo mai i lenei vaitau o loo tulai pea ma sisi le fu‘a o le tautua atunuu, ma faaoga lona tomai tau faasalalauga e finauina ai mataupu mo le manuia o le faamoemoe e ala i leitio e lua o loo ua iai nei.
O leitio e lua e pei ona ta‘ua, le NIU FM, ma le Radio 531 PI, o loo faatupeina uma e le malo ana faasalalauga, faatasi ai ma le tulaga o faasalalauga faapisinisi o loo nafa ma le aufaigaluega.
O le fonotaga la i le po o le Aso Tofi na tea nei, sa ta‘ua ai e Faamatuainu le faamautuina pea o le lagolago a le malo i leitio a le Pasefika, ae faalagolago lea malosiaga i le lelei ma le faatumauina pea o manaoga e pei ona faatulagaina mai.
Sa ta‘ua foi e Pereira le faigata o le tulaga o loo iai i le va ma le malo, ona o loo vaavaai nei le faiga malo i se isi suiga mo le tuufaatasia o tautua uma o loo faatupeina i tupe a tagata totogi lafoga. E lē na o leitio a le Pasefika, ae faapea foi le leitio a Niu Sila, o le televise a Maori ma isi.
O le utiuti ma le tau faasoasoa o seleni a le malo, ua mafua ai ona silasila toto‘a mo se isi faiga ina ia mautinoa ai e mafai ona faasaoina ma faaauauina pea auaunaga, aemaise ai ia faaaogā tatau tupe o le a faamatuu mai.
O le tala o le tupe faaletausaga sa fofogaina ma silasila i ai le aufono i lea po, sa faamauina ai le iai o le vaega tupe faasili mai leitio e lua, talu mai le taimi sa fofogaina ai le isi lipoti muamua.
O se tulaga lelei lea pe a fuafua atu i le palasi ma le pa‘ū maualalo o le tamaoaiga o le lalolagi na aafia ai ma Niu Sila.
O nisi o mataupu sa talanoaina e aofia ai le taumafai ina ia toe suia le nofoaga o loo iai nei le ofisa faasalalau o le kamupani ma leitio e lua e pei ona iai nei.
O Ponsonby i se vaega o le taulaga o Aukilani o loo faaaogāina mo galuega a leitio e lua, peitai ua finagalo le fono faatonu ma ona sui auai, ina ia aveese mai, ae saili se nofoaga i Aukilani i Saute.
Sa faailoa foi e Faamatuainu le mafuaaga o lea faaiuga, ona e toatele nisi sa tuualalo ma faasoa ane, e sese le nofoaga ma le itumalo o loo iai le ofisa o faasalalauga. E tatau ona nofo le ofisa i le itumalo o loo toatele ma mafuli i ai tagata Pasefika, o Aukilani i Saute lea, ma ua talia fiafia e le Fono Faatonu ma le pulega lea manaoga ma le fautuaga.
Pe faapefea ona mauaa ma lelei fesootaiga a leitio e lua ma tagata lautele poo tagata faalogologo? O se fesili sa faaleoina e le komiti o faatonu, talu ai e maitauina pea le toagaogao o i latou e auai i fonotaga pe a faia.
E lē gata foi i lea ae maitauina pea lava foi i lipoti ma faamaumauga le pa‘ū o fuainumera o tagata faalogologo.
O se mataupu sa umi o fefaaaliai ai finagalo o nisi i lea po, peitai e ui lava i finagalo e tele sa faaalia, ae ua toe foi le mataupu i le laulau ma ona sui, e toe talanoaina se faaiuga e fua i finagalo sa faaalia e sui auai o le fono.
O le po foi lea sa faailoa ai nisi o sui fou o le fono a faatonu mo le puleaina o faasalalauga a le Niu FM ma le Radio 531 PI. Ua filifilia se tasi o tamalii o le atunuu fai pisinisi, le susuga ia Uluomatootua Aiono, o le tamaitai Tonga o Sandra Kailahi, o se tamaitai sa faasalalau i le polokalame o Tagata Pasefika, ma o loo iai pea i polokalame o televise a Niu Sila.
O le isi sui o le alii o Willie Johnston o se alii tausi tusi, ma o ia foi lea ua nafa ma le vaaia o tupe.
