O le isi lima tausaga e tatau ona oo atu i ai ua malosi le unai o mataaga e lelei lona siosiomaga ma faamalosia puipuiga o le siosiomaga. O se tasi lea o taulai o le fuafuaga alualu i luma a le Pulega o tagata tafafao maimoa mai i fafo lea na faalauiloa i Apia i le vaiaso ua tuanai atu.
O le atinae aupito i tupe tele lenei ua faapea ona vaaia i lea tausaga ma lea tausaga i Samoa ma e tele lava foi galuega ua faatino i soo se itu o Samoa ma atunuu mamao ina ia mautinoa e tumau lea tulaga.
O le afioga i le Minisita Lagolago o le Pulega o Tagata Tafafao Maimoa mai i Samoa, le afioga Tafua Maluelue Tafua na saunoa i le faalauiloaina o lenei fuafuaga faataatia lea ua vaavaai ai i le unai o laufanua o Samoa ma ona mataaga o iai. E le gata i lea o le unai o faalauiloa ma ofisa o lenei pulega i atunuu o Europa, Asia, Amerika ma isi vaega o le Pasefika ina ia lelei le faalauiloaina o Samoa.
Faatoa mae‘a ona faalauiloa e le Lonely Planet se tasi o kamupani lauiloa i le lalolagi i atinae tau tagata tafafao, o Samoa e lona fā i le lisi o atunuu ua maualuga lona tulaga o se nofoaga mo tafaoga a soo se tagata.
E asiasi solo tagata o le ofisa lenei ma vaavaai lelei i atinae tau tagata tafafao maimoa i soo se itu o le lalolagi ma o iina e fai ai le latou faaiuga i atunuu e aupito saogalemu, matagofie ma mamā mo tafaoga, ma o Samoa lea ua lona fā i le agai mai i luga o atunuu ua ausia lea tulaga. O se mitamitaga lea mo Samoa e pei ona fofogaina i le vaiaso ua tuanai ae o loo ioe foi le Pulega o loo iai lava foi vaega tāua o lenei atinae e tatau ona faaleleia atili auā le mautinoa o le a avea Samoa ma atunuu numera tasi o atumotu o le Pasefika e agai mai i ai tagata o atunuu mamao.
O le taimi lenei o loo maualuga lava le numera o tagata Niu Sila ma Ausetalia i tagata asiasi mai ae ua alualu foi i luga le numera o i latou mai i Asia faapea ai Amerika ma Europa. O lea faatoa faitauina foi tagata tafafao mai i meli la‘upasese ma o le toatele lava e agai mai i Europa ma Amerika ma o iina ua vaaia ai le toatele o tagata asiasi mai.
E le gata i fuafuaga alualu i luma a le Pulega ae na faalauiloa ai foi ma isi tusi o faamaumauga e faatatau ia Samoa ua aogā mo soo se tasi lava e iai le manaoga e fia iloa isi vaega o le atunuu.O se alii e suafa ia Tuapou Warren Jopling na galue i lalo o le fesoasoani a le Malo o Niu Sila auā le tuufaatasia o le faataatiaga o Savaii, ma o lana galuega le isi tusi na faalauiloa ai i lenei faamoemoe.
O isi tusi ua faapea ona faalauiloa ai mataaga tu matafaga ma nisi o mataaga o Samoa mo tagata tafafao mai i le atunuu, ma na faafetaia e Tafua Maluelue lea galuega tele ua faaopoopo i faalauiloa o le atunuu ona o le fesoasoani a le Malo o Niu Sila.
O le galuega faalauiloa a Tuapou Warren ua vaaia ai nei le toatele ua iai le manaoga e mae‘a tafaoga i Upolu agai loa i Savaii. O isi tagata tafafao maimoa mai i fafo, ua faapea ona agai sa‘o lava i Savaii ona o le tele o le faalauiloa ua o latou maua. Mo le isi la lima tausaga o le unai lea a le Pulega ina ia mafai ona faatino le galuega lenei ma avea ai Samoa o se tasi o atunuu o le a agai sa‘o mai i ai le toatele mai i fafo auā a latou tafaoga ma faiga malologa.
