O le autu lena a le au faipepa le susuga ia Irene ma Faatamalii Kesi, o ni faiaoga uma mai le Iunivesite o Tekonolosi i Aukilani, lea sa faatinoina i le Aso Toonai na tea nei mo le faalauteleina atili o le silafia o faiaoga Aoga Amata. Na faalologo le vasega o faiaoga a o faasolo le tilivaga o le pepa, “Alo mai, alo atu” i le maatiati o le momoli a le susuga ia Irene sa faasoa ai ma le susuga ia Faatamalii. Sa saunoa e uiga i le tāua o le fefaasoaai faafesagai a faiaoga ma tamaiti i totonu o Aoga.
E tele uiga lelei sa faasoa i ai nei faiaoga ma sa faapea foi ona faatalanoaina e i latou sa auai le anoano o uiga talafeagai o lenei autu ma le feagai ai o faiaoga ma lo latou tiute o le faafeagai ma tamaiti.
Ua lē gata i le alo mai, alo atu o faiaoga ma tamaiti, ae ua faapea foi ona faasino i le alo mai, alo atu poo le faasoa faafesagai lea o mātua ma fanau, mātua ma faiaoga, matai ma le auaiga, pule ma le aufaigaluega, faifeau ma ekalesia, tamā ma tina, ma soo se toalua lava e faasoa faafesagai.
E leai se eseesega ma le pepa na sosoo ai a le afioga ia Vaovasamanaia Meripa Toso, o le faiaoga mai le Iunivesite o Aukilani, na ia faaautu ai lana faasoa i le upu, “Va”.
O lenei foi gagana/upu na ia suesue agai i ai mo lona faailoga o le Master. Sa faapea ai foi ona faatāuaina le Va ma ona uiga eseese e pei o le Va tapuia, Va fealoai, Va o gagana, Va lelei, Va nonofo, ma isi Va e pei ona faasoa i ai le vasega o faiaoga i le Va o faiaoga ma tamaiti, Va o mātua ma fanau, Va o matai ma le auaiga, Va o le malo ma tagatānuu, Va o faifeau ma ekalesia ma mea faapena (m.m.f.).
Na matagofie lenei fetufaaaiga ona sa mafai ona auai le afioga i le faipule ia Su‘a William Sio, o le Faatamā o le SAASIA (Sosaiete o Aoga Amata Samoa i Aotearoa) i le amataga o lenei fetufaaiga.
O le Fofoga o le polokalame le susuga ia Sofaea Penn (teutupe aoao) o le faalapotopotoga sa ia faafeiloaia le afioga i le faipule faapea le faatina le susuga ia Iole Tagoilelagi na saunia le lotu amata, ma le mamalu o faiaoga, ma faaopoopo i ai le saunoaga a le afioga i le Peresetene Aoao a le SAASIA o Sala Tagoilelagi-Leota e faafetaia le auai atu o le afioga i le faipule.
O fetufaaiga faaiu nei o le tausaga a le faalapotopotoga o le SAASIA, ona mae‘a ai lea ona faasolo itumalo uma o Niu Sila i nei galuega faasoa mo le faalauteleina o le silafia o faiaoga.
