Ina vivii atu ia i le Alii auā e lelei lava o ia, ma e faavavau lava foi lona faaneetaga i le Atua alofa. O le faafetai lea na saunoa i ai le susuga i le a‘oa‘o, Susuga Akelly Akelly na ia ave ai le faamanatu auā ua alagatatau ona ave ai le faamanu ma le faafetai e tusa ma nei tausaga e tele ua aulia manuia mai e le Susuga Matai‘a Steve Matai‘a i se mafutaga matagofie na saunia lelei e nai ona alo tamaitai mo le faamanatuina ma le faatāuaina o le laasaga ua oo i ai le soifuaga o le tamā.
Ia Matai‘a Steve, malo le soifua lagimaina i lau susuga auā o lea ua e aulia mai ma le fiafia lou aso soifua ma ua tatau ai le viiga ma le faafetai tele i le Atua, ona o le anoanoai o faamanuiaga ma le tamaoaiga i le tino ma le agaga ua na faapaleina ai lou soifua.
Ia alofagia lou soifua auauna i soo se mea ina ia saga faatamaoaigaina pea lou soifua e le Atua, e te faaaogāina ai ana taleni ma tofi ua na faamanuiaina ai oe auā le tausiga o si ou aiga aemaise o le faletua ma le nofoialo. Ia manuia tele lou aso soifua Matai‘a Steve Matai‘a. Alofaaga mo oe e lē uma mai lau fanau pele aemaise lou faletua ia Lesina Lologa Matai‘a, o ou aiga uma lava i Aotearoa nei ma Samoa, aemaise foi ou aiga uma i soo se vaega o le kelope.
