Ua taunuu i laufanua o Sini Ausetalia le faigamalaga mamalu a le Tausala Samoa poo faletua ma tausi o afioga i alii minisita ma faipule o le HRPP. O le Fetalaiga ia Tolofuaivalelei Leiataua ma le afioga i le Fofoga Fetalai, Laaulialemalietoa Asiata Polotaivao na taitai maia le malaga lea e aofia ai le faletua o le Alii Palemia o Samoa, susuga ia Tooa Latafale Gillian Malielegaoi faapea le faletua o le Sui palemia, Afioga Fonotoe Pierre Meredith.
E toa luasefulu le aumalaga ma na talimalo ai le EFKS Fairfield i le taunuu mai mo le inu ma le feiloaiga ma le pulega Sini Matu. Sa aofia ai foi ma le failautusi Aoao le susuga Rev Siaki Brown ma lona faletua ia Gaufa Brown aemaise faafeagaiga ma o latou faletua. Na mae‘a le ‘ava o le feiloaiga faagasolo foi teuga masani a le faigamalaga mo le mamalu o le pulega ma sosoo ai ma le taumafataga. O le afiafi lava lea na valaaulia ai le malaga e le Konesula a Samoa i Sini mo se taumafataga faapitoa ma feiloai ai.
Na sosoo ma le auai atu o le aumalaga mo se tusigaigoa auā lo latou afifio mai na faia i le Hall a le Maluapapa i le EFKS Fairfield.
E silia ma le $88,000 tala Ausetalia na ausia i lea aso mai le aao foai o aiga, uo ma ē masani. Sa faatautaia ma se toonai a le Pulega i le Aso Sa na auai ai uma aiga ma uo faapea sui o afioaga ma itumalo taitasi lea faatoa maua ai ma se avanoa e feiloai atu ai.
O le po o le Aso Gafua na faamavae atu ai loa Sini i le Tausala Samoa i se ‘Ava’ na faia ai lava i le EFKS Fairfield ma lulu lima ai loa ma faamavae auā le toe taliu atu i Samoa.
