O le faamoemoe o le Punialavaa e pei ona sa faataunuuina i le faaiuga o le vaiaso, sa matuā faatumulia e lē gata i le au valaaulia, ma malo faaaloalogia, ae sa lē mafai foi ona taofia le toatele o i latou sa agai ane ona o le fia molimauina o lea po tāua tele. O se vaaiga e pei ona molimauina e nisi o sui o le Samoa Times sa auai atu iai i lea po, ae faapea foi nisi o uo ma paaga sa auai ma avea o se po fiafia mo i latou.
O le toatele lava e fai mo latou mousa fatuga ma pesega a le Punialavaa, sa naunau tele i le toe fia vaai, ma le fia faafofoga pea i siufofoga mālie, ma le matagofie o le susuga i le Faafeagaiga ma le faletua, Lale ma Vini Peteru, ua faaopoopo atu i ai ma o laua alo e toatolu. O le Fetii-o-Fatuga ua faaigoaina, E iloa oe i lau gagana, ma e sefulutasi pese o loo iai, lea sa faapitoa lona umusaina i le po o le Aso Faraile na tea nei aso 15 o Aperila.
E lei maua se feiloaiga ma le susuga i le Faifeau ma le faletua, peitai o le molimau ma le tele o faamatalaga a nisi o le mamalu o le atunuu sa auai, sa latou ta‘ua ai ma tala faamamai i le matagofie tele ma le toe faafofogaina o le Punialavaa i lea po, aemaise ai sa silasila ma faafofoga i ai i le taimi lava e tasi, auā sa faataunuuina o se koneseti.
O se tasi o tulaga sa faamalieina ai le au maimoa ma le au faafofoga, ona sa matuā malamalama lelei i le faamatalaina o uiga ma upu, ma le agaga sa tusia ai lea pese ma lea pese. O se tasi foi o itu sili ona tāua mo le au faafofoga, auā e muliai ona faalogoina i soo se taimi e taina ai, ae ua manino ma atoatoa le silafia i le uiga o le Fetii-o-Fatuga, e pei ona faalauiloaina.
O le isi itu sa agai pea i ai talanoaga ma molimau a le toatele, o le tamaoaiga o le gagana sa fatufatu ai pese, ma faaaogāina mo le usuina ma lona faaleoina. E talitonu nisi o le isi lea vaega o loo tulaga muamua ai pea le Punialavaa ia latou lava faatulagaina, ona o le gagana ma le agaga, ae salani loa i le matagofie ma le fetaui lelei o siufofoga, ma le faapa‘ōina o musika.
O le faili a le Sweet and Irie, o le tasi lea o mafuaaga sa faaopoopo i le saga faatosina atu o le toatele i le po fiafia o le Punialavaa. O se taimi muamua lenei ua ta ai lea foi faili tautaua i Niu Sila, i se koneseti Samoa. O le galuega tuufaatasi a le Punialavaa ma le Sweet and Irie i lea po, sa avea ma faamanuiaga i le toatele o tamafanau a le atunuu, e fiafia i pese ma fatuga faapea ma musika.
O le taimi nei ua avanoa le CD Fetii-o-Fatuga, ma pese e sefulutasi i luga o le maketi mo le faatauina atu, mo soo se tasi lava o loo fia faafofoga i ai. E pei lava foi ona faalaulioa atu i le vaiaso talu ai, le aano moni ma le sini autū o lenei galuega ma le taumafaiga a le Punialavaa.
O le fia fesoasoani lea i le tulaga tau seleni, mo le faaveina ma le tau amataina o le ekalesia New Vision EFKS i Magele. O se ofo sa ta‘ua e le faletua ia Vini, e faitaulaga ai, o ā uma seleni e maua i lea po, atoa ai ma ni tupe o le lagolago a le au faatau e ala i le faatauina o le CD, o le a faamealofa e le Punialavaa mo le faamoemoe o le New Vision.
Malo lava Punialavaa! E te fai mea sili lava oe, ma silisili ai pea lava, ae sili ai ona viia le Alii, o lē ona ma foai mai taleni ma meaalofa e toe faafoi ai lona viiga e faavavau.
