“E lē o se ki o le saolotoga ae o le ki e loka mau ai i faaosoosoga”
Na matuā faatumulia le Hall a le Ekalesia a le Au Paia o Aso e Gata Ai i Eight Mile Plains i le mamalu o le auvalaaulia faapea aiga ma Uo a le tamaitai o Rosie Lepua i le faamanatuina o lona 21 tausaga.
O le Fesoasoani o le Epikopo a Eight Mile Plains, le susuga ia Vaoga Atinae Fafai na taitaia le sauniga o le aso fanau sa faamanatuina i le Aso Toonai na se‘i mavae atu nei. Na soifua mai lenei tamaitai i le aso 12 o Apreila i le tausaga 1990, ae faato‘ā faamanatuina i le faaiuga o le vaiaso ua fetaui lelei ma tapenaga ma taimi avanoa.
O le pule o le tausamaaga o le uncle o le tamaitai o Rosie, le Tofa Niuafu Siaosi Lepua o ia foi sa fai ma fofoga o le aso.
O mātua o le tamaitai o Rosie, o lona tamā o Tala‘itau Lofi Lepua mai le alalafaga o Satupaitea i Savaii, ma si ona tina o Puna Lepua mai le alalafaga o Vaiala i Apia. O le tausi ia Puna sa faia le molimau o le olaga o Rosie lea na mālie i lana saunoaga ma taliga fia faalogo ai le auvalaaulia, o Rosie o se tamaitai loto alofa, ma e pei o se tama o le aiga ona e fai uma e ia feau ma tonu o le aiga, e lē gata i lea o le toaga e suesue mataupu auā le sailia o a‘oa‘oga mo lona lumanai.
Na ta‘ua foi e le tina ia Puna, “Rosie o le ki lea o le a foaina atu ia te oe, e lē o se ki e tatala ai lau filifiliga fai, ae o le ki e loka mau ai oe mai le aafia atu i virus oso faasalavei ma faafitauli o lenei olaga o loo tamomoe mai ua ova ma kilomita faatulagaina le saosaoa.”
Na vaaia le taliē o le aofia a o saunia e si ona tina le molimau e saafi ai foi i uiga tausaafia o si ola alo. O ana saunoaga faamamafa pea, ina ia saga faatumauina pea le usiusitai i mātua, ae sili ona faamausaliina pea le laufofoga fiafia i le va ma tagata. Na matuā faafiafiaina le auvalaaulia i faafiafiaga eseese na saunia e ana uo faapea aiga, aemaise ai.
Manuia tele lou 21 Rosie, toe faaopoopo nisi tausaga se tele mo oe ma ia e tumau i ou uiga tausaafia o le loto alofa.
